Чуор кинигэтэ сүрэхтэннэ

Ыам ыйын 16 күнүгэр П.А. Ойуунускай аатынан литературнай түмэлгэ саха биллиилээх суруйааччыта, суруналыыһа, СӨ Култууратын үтүөлээх үлэһитэ Николай Иванович Харитонов- Николай Чуор быйыл төрөөбүтэ 90 сылын туолар.

Манан сибээстээн Н.И.Харитонов-Николай Чуор «Олох умсулҕана» диэн кинигэтин сүрэхтэниитэ буолла. Кинигэни кыыһа Күннэй Николаевна, суруналыыс Надежда Егорова-Намылы, фольклорист учуонай Анна Николаевна Данилова көрөн-истэн таһаардылар. Саха норуодунай суруйааччылара Николай Лугинов, Сайа, суруйааччы Арчылан, Ил Түмэн дьокутааттара А. Григорьева, В. Прокопьев, суруналыыстар М. Винокурова, А. Тарабукина, о.д.а. элбэх дьон истиҥник иһирэхтик эттилэр. Ырыаһыттар СӨ норуодунай ырыаһыта А.Емельянов, үтүөлээх артыыс Т. Попова, А. Готовцева, Сунтаар Күөрэгэйэ, о.д.а. ырыаһыттар Чуор ырыатын ыллаатылар.

Кинигэ сүрэхтэниитигэр кыттыбыт дьон Ньурба улууһугар суруйааччы Ньукулай Чуор 90 сылыгар аналлаах араас тэрээһин ыытыллаары турарын эттилэр. Бэс ыйыгар Сиэйэҕэ литературнай, култуурунай тэрээһиннэрэ буолаары турар.

Сиэнэ Дуолан Харитонов эһэтин Чуор алгыс хоһоонун ааҕыытынан түмүктэннэ. Бар дьон Чуор кэрэ киһи буоларын бэлиэтээтилэр.Чуор курдук олоҕу сыаналыахха,үөрэ-көтө сылдьыахха дэстилэр.

Марта Николаева