Чурапчы иистэнньэҥнэрэ байыаннай дьайыы кыттыылаахтарыгар сылаас таҥас тигэллэр

Мугудай нэһилиэгэр «Сайдыына» дьахталлар түмсүүлэрэ бэрт таһаарыылаахтык үлэлиир. Кинилэр нэһилиэк, улуус уопсастыбаннай олоҕуттан хаһан да туора турбакка барытыгар актыыбынайдык кытталлар. Бу туһунан «Саҥа олох» хаһыат суруйар. 

Ааспыт сылга бу түмсүү кэрэ аҥаардара «Кыайыы талисмана» диэн социальнай хайысхалаах бырайыак оҥорон Саха өрөспүүбүлүкэтин Ил Дарханын 900-тэн тахса тыһыынча суумалаах Гранын ылары ситистилэр уонна бу көрүллүбүт харчынан иистэнэр, көбүрүйэр массыыналары, таҥас матырыйаалларын, тустаах оборудованиелары ылан номнуо үлэлэрин саҕалаабыттара. Бырайыак ааптардара, салайааччылара «Сайдыына» түмсүү бэрэссэдээтэлэ, норуот маастара Екатерина Захарова уонна «2023 сыл бастыҥ уопсастыбанньыга» номинация хаһаайката, Мугудай орто оскуолатын математикаҕа учуутала Мария Варламова этэллэринэн, кинилэр сүрүн сыаллара-соруктара: үүнэр көлүөнэни патриотическай тыыҥҥа иитии, оҕолорго дойдуга тапталы, төрөөбүт дойду иһин киэн туттуу санаатын иҥэрии, иис маастарыстыбатыгар үөрэтии. Биллэн турар, ханнык да бырайыак уопсай хамаанда күүстээх үлэтиттэн тутулуктаах. «Кыайыы талисмана» бырайыак олоххо киирэригэр норуот маастара, идэтийбит иистэнньэҥ, Мугудайдааҕы «Чуораанчык» уһуйаан сэбиэдиссэйэ Аксинья Сивцева, Чурапчы улууһун дьахталларын сэбиэтин бэрэссэдээтэлэ Анастасия Афанасьева төһүү күүс буолаллар.

Аҥаардас бу «Сайдыына» түмсүү эрэ буолбакка, улууспут дьахталларын сүбэтэ, нэһилиэктэргэ баар дьахталлар түмсүүлэрэ, аһыныгас сүрэхтээх баҕа өттүнэн кэлэн көмөлөһөр волонтердар—бука бары актыыбынай кыттыыны ылан, ким хайдах бириэмэлээҕиттэн көрөн үлэлии, иистэнэ сылдьаллар.

Дойдуларын туһугар байыаннай дьайыыга кытта, кыайыыны уһанса сылдьар биир дойдулаахтарбытыгар, хорсун-хоодуот ыччаттарбытыгар улуус кэрэ аҥаардара илиилэрин итиитин, алгыс тылларын иҥэрэн тикпит «Талисман победы» диэн анал суруктаах сылаас таҥас, мал-сал кэмпилиэктэрин, Чурапчы ытык сирин хатарыллыбыт отун, отоннорун, харысхалларын бастакы баартыйата бу күннэргэ номнуо уолаттарга тиэрдиллиэҕэ.

Онтон салгыы бырайыак үлэтэ уостубат, сүрүн соругун толорон идэтийбит иистэнньэҥнэр, норуот маастардара бэйэлэрин баай уопуттарынан оскуола үөрэнээччилэрин кытары үллэстэн, оҕолор иистэнэр үөрүйэхтэрин сайыннарыахтара, үөрэтиэхтэрэ, уһуйуохтара. Сыл устата бырайыак чэрчитинэн араас маастар-кылаастар, аахсыйалар, куонкурустар ыытыллыахтара.

Наталья Сибирякова.