Чурапчы күөлүн Улуу Кыайыы 80 сылын логотиба киэргэттэ

Аҕа дойду көмүскээччитин күнүн көрсө Чурапчы күөлүн 7200 кв.м. иэннээх сирин мууска хаарынан уруһуй киэргэттэ. Олохтоохтор Улуу Кыайыы 80 сылыгар аналлаах улахан бырайыагы көҕүлээн олоххо киллэрдилэр.

Уруһуйга Улуу Кыайыы 80 сылын официальнай логотибын ойуулаатылар — «Родина-мать зовет!», георгиевскай лиэнтэ, «Победа» диэн тыл уонна «80» сыыппара ойууланна.

«Бэртээхэй хартыына — өбүгэлэрбит үтүө өйдөбүллэригэр ытыктабылы, эйэлээх халлааммытын санатар. Элбэх киһи сүрэҕин холбообут ураты бырайыак Аҕа дойдуну көмүскээччи бырааһынньыгын иннинэ улуус бары олохтоохторугар уонна ыалдьыттарыгар олус үчүгэй бэлэҕинэн буолла», — диэн бэлиэтээтэ ТГ-ханаалыгар Ил Дархан Айсен Николаев.

Бырайыак Сергей Федоров салайыытынан талааннаах худуоһунньуктар күүстэринэн олоххо киирдэ. Уус-уран айымньыны дириэктэри солбуйааччы Максим Смирников уонна «Айылгы» норуодунай айымньытын дьиэтин дириэктэри солбуйааччы Розалия Игнатьева салайдылар. Хартыынаны оҥорорго үс тиэхиньикэ, ону таһынан 130 киһи илии үлэтэ туһанылынна. Хас биирдии ойуу элэмиэнэ барыта илиинэн оҥоһулунна.

2025 сыл дойдуга Бэрэсидьиэн Владимир Путин Аҕа дойдуну көмүскээччи сылынан биллэриллибитэ. Оттон Саха сиригэр Айсен Николаев 2025 сылы Ийэ дойдуну көмүскээччи сылынан биллэрбитэ.