Чурапчы олохтооҕо кирэдьиит харчытын инвестициялаан баран, албыннаппытын билэн, суукка үҥсүбүт

Былырыын кулун тутар ыйыгар Чурапчы улууһун олохтооҕо интэриниэккэ харчыны үлэ биржатыгар уган үлүннэрии туһунан угуйугу көрбүт.

Эр киһи ыйыллыбыт сигэнэн киирэн сайаапка хаалларбыт. Кэлин киниэхэ биллибэт киһи эрийэн, бэйэтин биржа менеджерэбин диэн билиһиннэрбит уонна кирэдьиит ыларга сүбэлээбит. Үҥсээччи сөбүлэһэн, тус дааннайдарын менеджергэ биэрбит, оттон ол киһи кини аатыттан бааҥҥа кирэдьиит ыларга сайаапка ыыппыт. Киирбит харчыны эр киһи менеджер ыйбыт каартатыгар ыыппыт. Ити кэннэ хара санаалаах сибээскэ тахсыбат буолбут уонна бүгүҥҥү күҥҥэ диэри үҥсээччи укпут харчытын төнүннэрэ илик. Бу туһунан Саха сирин Үрдүкү Суутун пресс-сулууспата иһитиннэрэр.

Албыннаппытын өйдөөн, эр киһи полицияҕа сайабылыанньа суруйбут — холуобунай дьыала тэриллибит. Ол кэннэ кини бааны утары кирэдьиит дуогабарын күүһэ суоҕунан билинэргэ уонна ол сөбүлэҥ содулун көтүрэргэ суукка үҥсүбүт. Суут быһаарбытынан, баан кирэдьиити биэриэн иннинэ, сайабылыанньа биэрбит киһи кирэдьиит ылыан баҕарарын бэрэбиэркэлээбит. Баан бу операцияны саарбахтаан, кирэдьиит биэриитин суукка устата тохтоппут, ол туһунан үҥсээччигэ смс-биллэрии ыыппыт. Кэлин үҥсээччи баан систиэмэтигэр бигэргэтэр паролу сөпкө киллэрэн, бэйэтин илии баттааһынын солбуйар ньыманан биирдиилээн усулуобуйаҕа илии баттаабыт, онтон баан кирэдьиит харчытын үҥсээччи счетугар ыыппыт. Албакаат «үҥсээччи кирэдьиит ылар наадата суоҕун, эр киһи маны таһынан өссө икки кирэдьииттээҕин» дакаастабылын суут олоҕо суоҕунан аахта, тоҕо диэтэххэ үҥсээччи суукка кирэдьиити бэйэтин көҥүл өттүнэн баҕатынан ылбытын, харчы киниэхэ инвестицияҕа наада буолбутун быһаарбыт. Түмүгэр Саха Өрөспүүбүлүкэтин Чурапчытааҕы оройуонун суута үҥсээччи ирдэбилин толорору аккаастаата. Быһаарыы сокуоннай күүһүгэр киирдэ.