Чурапчы улууһа аһынан-үөлүнэн толору хааччынар

Тыа хаһаайыстыбатын миниистирин солбуйааччыта Сахайаана Павлова Мындаҕаайы нэһилиэгэр үлэлээтэ. Бу туһунан Тыа хаһаайыстыбатын министиэристибэтин пресс-сулууспата суруйар.

Миниистир солбуйааччыта «Павлов Д.Д. КФХ» уонна «Эйгэ» ТХПК үлэтин кытта билистэ. Ол курдук, скуола бааһыналарыгар сырытта, эбиэс үүнүүтүн, хортуоска харайыллар хранилищетын, сиилэс угуутун уонна хаппыыста үүнүүтүн көрдө.

«Сири нүөлсүтэр систиэмэ кыаҕын күүскэ туһанаммыт, сүөһүгэ от аһы 50% кыччатаммыт, сүөһү аһыгар барсар элбэх сүмэлээх аһы үүннэрэн ылыыбытын үрдэтиэх тустаахпыт. Оччоҕо сүөһүттэн ылар бородууксуйабыт улаатыа. Ил Дархан Айсен Сергеевич Николаев дьаһалынан тыа хаһаайыстыбатын бородууксуйатын 1,5 төгүл үрдэтиэхтээхпит. Ол курдук, өрөспүүбүлүкэ бааһыналарын 50 тыһыынча гааттан 70 тыһыынча гааҕа диэри улаатыннарар сорук турар», — диэтэ Сахаяна Афанасьевна.  Сахайаана Павлова Мындаҕаайы сирэ-уота Чурапчы улууһун аһынан-үөлүнэн толору хааччыйар кыахтааҕын  бэлиэтээтэ.