Чурапчы улууһугар Бырабыыталыстыба отчуота саҕаланар

Бүгүн, олунньу 26 күнүгэр, өрөспүүбүлүкэ ситэриилээх былааһын отчуота Чурапчы улууһугар ыытыллар. Отчуоттуур бөлөҕү СӨ Бырабыыталыстыбатын Бэрэссэдээтэлин бастакы солбуйааччы Дьулустаан Борисов салайар.

Улуус иһигэр үс бөлөҕүнэн хайдыһан, бары нэһилиэктэргэ тиийиэхтэрэ. Ол курдук, бөлөхтөрү Тыа хаһаайыстыбатын уонна аска-үөлгэ бэлиитикэтин миниистирин солбуйааччы Сахаяна Павлова, экэниэмикэ миниистирин солбуйааччы Иван Евсеев, тырааныспар уонна суол хаһаайыстыбатын миниистирин солбуйааччы Семен Коркин салайыахтара.

Ааспыт отчуоттарга нэһилиэнньэ көхтөөхтүк кыттыбыта. Бу да сырыыга оннук кытталларыгар эрэл баар. Онон бүгүн бастакынан Бырабыыталыстыба отчуотун Одьулуун, Бахсы, Мугудай нэһилиэктэрин олохтоохторо истиэхтэрэ.

Санаттахха, Саха сиригэр тустаах отчуот олунньу 3 күнүттэн саҕаланан, кулун тутарга диэри түмүктэниэҕэ. “Саха” НКИХ түмүгү таһаарыахтара.