Чурапчы улууһугар сүппүт дьон сибээскэ таҕыстылар

Чурапчы улууһугар сүппүт икки киһи аймахтарын кытта сибээскэ таҕыстылар. Кинилэртэн үс хонук устата туох да сурах иһиллибэтэҕэ. Эр дьон тыыннаахтарын уонна чэгиэннэрин туһунан балаҕан ыйын 8 күнүгэр Саха сиринээҕи Быыһыыр сулууспата иһитиннэрдэ.

Быыһааччылар иһитиннэрбиттэринэн, икки эр киһи балаҕан ыйын 5 күнүгэр Чурапчы сэлиэнньэтиттэн Маадьадьа диэн сиргэ сылгы баазатыгар күрүө тута барбыттар. Кинилэр болдьоммут кэмнэригэр төннүбэтэхтэринэн, аймахтара тыллаабыттар. Сүппүт дьонтон биирдэстэрин кэргэнэ эппитинэн, эр киһи урут хаһан да маннык сүппэт эбит. Эбиитин суотабай сибээс суох эбит.

Дьон сүппүтүн туһунан сайабылыанньа Биир кэлим диспетчерскэй-сулууспатыгар балаҕан ыйын 7 күнүгэр киирбит. Ол күҥҥэ дьону көрдүү 10 киһи тахсыбыт: түөрт быыһааччы, үс полицейскай уонна үс олохтоох киһи.

«16:03 чааска эр дьон аймахтарын кытта сибээскэ тахсан, тыаҕа мунан хаалбыттарын уонна суол көрдөөбүттэрин туһунан иһитиннэрдилэр. Билиҥҥи туругунан Түөйэ диэн сир аттынан айаннаан иһэллэр, суотабай сибээс баар буолла», — диэн Саха сиринээҕи Быыһыыр сулууспатын иһитиннэриитигэр этиллэр.