Чурапчы урбаанньыта мини-маркет аһан, «Мой бизнес» кииниттэн бэлэх тутта

Бу күннэргэ Марианна Кардашевская урбаанньыт быһыытынан регистрацияланан баран, кэргэнин кытары «Баланс» мини-маркеты аста диэн «Мой бизнес» киин иһитиннэрэр.

Кинилэр атыы-эргиэн уратыларын эрдэттэн үөрэтэн, ассортименнарын былааннаан, бородууктаны атыылаһыынан дьарыктаммыттар. Билиҥҥи туругунан, күннээҕи туттуллар бородууктаны, фруктаны уонна бэйэлэрэ үүннэрбит оҕуруоттарын аһын атыылыыллар.

Оттон урбаанньыттар маҕаһыыннарын аһыллыытыгар «Мой бизнес» киинтэн полиграфическай нобуору бэлэх туттулар.

Бэлиэтээн эттэххэ, саҥа саҕалыыр урбаанньыттар аччыгый уонна орто урбааны сүрүннүүр тэрилтэҕэ рекламалыыр-полиграфическай нобуордары оҥотторорго сайаапка биэриэхтэрин сөп. Ол туһунан https://мойбизнес14.рф/vovlechenie2024/ сигэнэн киирэн билсиэххитин сөп.

Марианна Кардашевская эппитинэн, бэйэтэ дьаһайар маҕаһыынын аһыан баҕарбыта ырааппыт эбит. Кини маҕаһыыныгар дьиҥнээх, Саха сиригэр оҥоһуллан тахсыбыт уонна олохтоох бородууксуйаны атыылыыр былааннаах.

«Биһиги бэйэбит сиэн көрөн, сөбүлээбит аспытын эрэ атыылыыбыт. Биһиги дьон сылдьарыгар табыгастаах буоларын курдук, маҕаһыын ыраас, хаачыстыбалаах табаардаах уонна арааһа элбэх буоларын ситиһиэхтээхпит», — диэн урбаанньыт санаатын үллэстэр.