Чурапчыга аҕаларга пуорум үрдүк тэрээһиннээхтик ааста

Чурапчыга “Аҕа – ыал олоҕун сүрүннээччи, кэскиллээх өйү-санааны киллэрээччи” диэн аҕаларга, эр дьоҥҥо анаммыт пуорум быйыл алтыс сылын ыытылынна.

Устуоруйаттан аҕаллахха, бырайыак ааптарынан “Туллукчаан” уһуйаан социальнай педагога Мария Баина, оттон тэрийээччинэн “Куоҕалы” ТОС бэрэссэдээтэлэ Федора Седалищева буолаллар. Оччолорго бу түөлбэҕэ баар тэрилтэлэр бука бары бастакы саҕалааһыны өйөөн, пуорум үрдүк таһымнаахтык ааспыта, диэн «Саҥа олох» хаһыат иһитиннэрэр.

Онтон тирэхтэнэн, күн бүгүн пуорум улуус таһымнаах буолан, сыллата эр дьон кыттара элбээн иһэр. Эҕэрдэ тылларын улуус баһылыга Степан Саргыдаев, Чурапчы нэһилиэгин баһылыгын солбуйааччы Варвара Макарова, Чурапчы нэһилиэгин “Удьуор” эр дьонун түмсүүтүн салайааччыта Дмитрий Слепцов, тэрийээччилэр, о.д.а. эттилэр, наҕараадалары туттардылар.

Улуус баһылыга Степан Саргыдаев дьиэ кэргэн тутуктаах буолуутугар кылааттарын иһин махтал суругу А.К. Софронов аатынан успуорт комплексын дириэктэригэр Михаил Степановка, С.А. Новгородов аатынан Чурапчы орто оскуолатын учууталыгар Евгений Прокопьевка уонна «Эгэлгэ» маҕаһыын үлэһитигэр Дмитрий Портнягиҥҥа туттарда.

Чурапчы нэһилиэгин аатыттан Варвара Макарова «Үтүөлээх аҕа» ааты «Саргыдай» бааһынай хаһаайыстыба салайааччытыгар Станислав Сивцевкэ, «Чурапчы нэһилиэгин сайдыытыгар кылаатын иһин» бэлиэни РФ Үлэ бэтэрээнигэр Иван Неустроевка, өйдөбүнньүк чаһылаах бочуотунай кырааматаны байыаннай дьайыы кыттыылааҕар Алексей Архиповка уонна өйдөбүнньүк манньыаттаах махтал суругу «Дорожник» ХЭТ суоппарыгар Иван Поисеевка туттарда.

Аһаҕас кэпсэтиини улуус дьокутаата, “Саарба” булт-алт маҕаһыынын салайааччыта Алексей Егоров ыытта. Ыалдьыттарынан Инновационнай үөрэҕирии сайдыытын киинин салайааччыта Дмитрий Титов, СӨ Арыгы ырыынагын бэрээдэктиир салалта салайааччыта, СӨ Физкултуура уонна успуорт туйгуна Матвей Лыткин, Саха судаарыстыбаннай тыйаатырын артыыһа Аркадий Николаев – Эрхан, Тулагы Киллэм нэһилиэгин баһылыга, Дьокуускай куорат аҕаларын түмсүүтүн салайааччыта Егор Попов уонна «Максимов и партнеры” юридическай хампаанньа салайааччыта Николай Максимов буоллулар. Аһаҕас кэпсэтиигэ кэлбит эр дьон көхтөөхтүк кытыннылар, бэйэлэрин санааларын эттилэр.
Пуорум сүүйүүлээх оонньуунан уонна быыстапка кыттыылаахтарын наҕараадалааһынынан түмүктэннэ.

Чурапчы нэһилиэгин «Удьуор» эр дьон түмсүүтүн бэрэссэдээтэлэ Дмитрий Слепцов:

Мин түмсүүгэ үлэлээбитим уонча сыл буолла. Үлэбит сүрүнэ оҕону иитии, булка-алка сыһыарыы уонна аҕа оруолун үрдэтии буолар. Бүгүн пуоруму алтыс төгүлүн тэрийдибит. Булт уопсастыбата, Росгвардия, лесничество, ГИБДД курдук тэрилтэлэр бэрэстэбиитэллэрэ кэлэн кэпсээтилэр, сүбэ-ама биэрдилэр. Дьокуускайтан эмиэ биир сыаллаах-соруктаах үлэлиир ыалдьыттарбыт кэллилэр. Түмүккэ салгыы үлэлииргэ резолюция ылынныбыт.

Елена Макаринская