Чурапчыга — Андрей Чикачев быыстапката

Биллиилээх худуоһунньук Андрей Васильевич Чикачев Чурапчыга  Афанасий Мунхалов аатынан арт-галереяҕа быыстапкатын туруорда. Бу туһунан улуус баһылыга Степан Саргыдаев иһитиннэрдэ.

— Андрей Васильевич быыстапкаҕа үгүс  хартыыналарын, ону таһынан түмэллэртэн, биирдиилээн дьонтон, доҕотторуттан уларсан аҕалбыт үлэлэрин көрдөрүүгэ туруорда. Мустубут дьон, биһиги, кинини илэ бэйэтин көрөн, тутан олорон, кэпсээнин истэн дуоһуйдубут, астынныбыт.

Кини хартыыналарыгар биир үгүс тыа сирин олоҕо, дойдубут кэрэ айылҕата көстөр. Биһиги дьиэ кэргэн «Эбэм ытарҕата» үлэтин тус бэйэтиттэн автографтатан ылан, үөрүүбүт муҥура суох.

Бүгүҥҥү көрсүһүүгэ кэлбит кэнчээри ыччаппытыттан Андрей Чикачев курдук биллэр-көстөр худуоһунньуктар тахсыахтара диэн эрэнэбин. Андрей Васильевичка уостубат иэйиини, умсулҕаннаах үлэни, ситиһиилэри баҕарабын, — диэн Степан Саргыдаев телеграмҥа ханаалыгар суруйда.