Чурапчыга автоцистерна түҥнэстэн, уматык тохтубут

Бэҕэһээ, атырдьах ыйын 25 күнүгэр, 14:00 чаас саҕана Чурапчытааҕы энергонадзор иниспиэксийэтигэр Чурапчы сэлиэнньэтиттэн Уһун Күөл диэки суол 13-с км-гэр дизель уматыгын уонна бэнсиини тиэйэн испит массыына саахалламмытын туһунан иһитиннэрбиттэр. Экология министиэристибэтин иниспиэктэрдэрэ быһылаан буолбут сиригэр тиийбиттэр.

545ЗМА-160 «FAW» маркалаах массыына суоппара сатаан салайбакка, массыыната түҥнэстибит. Саахал түмүгэр 15,9 кв.м. иэннээх сиргэ уматык тохтубут.

Иниспиэктэрдэр буортан боруоба ылбыттар, уматык тохтубут сирин кээмэйдээбиттэр. Уматыгы атын цистернэҕэ көһөрбүттэр.

Тырааныспар хаһаайына киртитиллибит учаастагы сорбенынан ыраастаабыт. Аны сокуон быһыытынан, кылгас кэм иһигэр киртиппит буорун чөлүгэр түһэриэхтээх.