Чурапчыга балыыһа иккис уочарата үлэҕэ киллэриллиэҕэ

Маны таһынан ааннары туруораллар, сантехниканы таҥаллар, кырааскалыыллар.  Сотору кэминэн мэдиссиинискэй  миэбэли уонна тэрили таҥан туруоруохтара. Бырабыыталыстыба бэрэссэдээтэлин солбуйааччы  Георгий Степанов сорудаҕынан, тутуу үлэтэ кулун тутар бүтүүтэ түмүктэниэхтээх.

Саҥа эбийиэккэ симиэнэҕэ 100 киһи сылдьар кыахтаах поликлиника, терапия отделениета, дьахтар уонна оҕо консультацията, күнүскү сытар куойка (10), стоматология уонна доруобуйаны чөлүгэр түһэрэр отделениелар баар буолуохтара. Хаһаайыстыбаннай блокка   мэдиссиинэ суһал көмөтүн отделениета (гараастаах уонна ыскылааттаах) киириэҕэ. Мэдиссиинэ комплекса аныгы стандартка эппиэттиир үрдүк технологиялаах тэриллэринэн сэбилэннэ.  Чурапчы эмчиттэрэ саҥа тиэхиньикэлэнэн, ыарыыны быһаарар уонна эмтиир саҥа ньымалары баһылыыр былааннаахтар.

Саҥа комплекс  дойду Аҕа баһылыга Владимир Путин көҕүлээбит «Доруобуйа харыстабыла» национальнай бырайыак иитинэн, «Доруобуйа харыстабылын бастакы сүһүөх звенотун саҥардыы» эрэгийиэннээҕи бырагырааманан тутуллар.