Чурапчыга спартакиадаттан дьон-сэргэ сэргэхсийдэ

Бэҕэһээ  Чурапчы сэлиэнньэтигэр олус үчүгэй, сэргэх күрэхтэһии буолла.

А.И.Федотов аатынан успуорт киинигэр улуус аҕам саастаахтарын спартакиадатыгар элбэх киһи кытынна. Манна спортсменнар да, көрөөччүлэр да элбэхтэр. Күрэхтэһиини үөрүүлээхтик аһыыга улуус баһылыга Степан Саргыдаев, Чурапчы нэһилиэгин баһылыга Владимир Сивцев, кырдьаҕастар сэбиэттэрин бэрэссэдээтэлэ Мотрена Матвеева, бэтэрээн спортсменнар сэбиэттэрин бэрэссэдээтэлэ Герасим Платонов эҕэрдэ тыл эттилэр. Бастыҥ спортсменнар дохсун ытыс тыаһыгар арыалланан наҕараадалары туттулар.

Күрэхтэһии холбоһуктаах хамаандаларынан ыытылынна. Илин-кэлин түсүһүү, күрэхтэһии күүрээннээҕэ манна буолла. Мындаҕаайы хамаандата (Болтоҥо, Мырыла, Мындаҕаайы, Одьулуун), Дириҥ (Чакыр, Хайахсыт, Дириҥ), Мугудай (Бахсы, Алаҕар, Мугудай, Төлөй), Чурапчы бастакы, иккис хамаандалара, Сылаҥ (Арыылаах, Кытаанах, Сылаҥ) хамаандалара күөн көрүстүлэр.

Сахалыы волейболга Чурапчы бастакы хамаандата кыайан үөрүү-көтүү бөҕө буоллулар. Иккис — Мындаҕаайы, үһүс — Дириҥ хамаанлалара буоланнар, дьоннорун-сэргэлэрин үөртүлэр. Остуол тенниһигэр күрэхтэһээччилэр сымсалара, түргэн туттунуулаахтара сөхтөрдө. Түмүккэ Дириҥ спортсменнара бастаатылар. Мындаҕаайы — иккис, Чурапчы бастакы хамаандата — үһүс миэстэлэри ыллылар. Саахымакка киирсии эмиэ сытыытык барда. Дириҥ кыайда, иккискэ Чурапчы бастакы хамаандата тахсан үөрүү буолла. Мындаҕаайылар үһүс бириистээх миэстэҕэ тиксэн астыннылар. Дуобакка эмиэ киирсии кытаанаҕа буолла. Манна Чурапчы бастакы хамаандата кыайан эҕэрдэ бөҕөтүн туттулар. Иккискэ Чурапчы иккис хамаандата тахсан үөрүүлэрэ букатын үрдээтэ. Үһүскэ Дириҥ хамаандата таҕыста. Хабылыкка, хаамыскаҕа сэргэх киирсии буолан, болҕомтону тардыан тарта. Мугудай сымса-сылбырҕа туттунуулаах, имигэс илиилээх спортсменнара бастаатылар. Мындаҕаайы спортсменнара иккистээтилэр. Чурапчы бастакы хамаандата үһүскэ таҕыста. Хайыһарга тиритэ-хорута сүүрүү, ыһыылаах-хаһыылаах күрэхтэһии кэнниттэн, Дириҥ — бастакы, Сылаҥ — иккис, Чурапчы бастакы хамаандата үһүс буоллулар.

Түмүккэ Дириҥ хамаандата кыайыылааҕынан тахсан үөрүүлэрэ-көтүүлэрэ муҥура суох буолла. Иккис Чурапчы бастакы хамаандата, үһүс Мындаҕаайы буоллан дьоннорун-сэргэлэрин үөртүлэр. Кубогынан наҕараадаланнылар. Көрүҥнэринэн кыайыылаахтар, бириистээх миэстэлээхтэр мэтээл кэттилэр.

Аҕам саастаахтар спартакиадалара олус сэргэхтик ыытылынна. Хамаандалар бары оҥостон, үчүгэйдик бэлэмнэнэн кэлбиттэрэ сыаналанна. Эдэр ыччакка үтүө холобур буоллулар.

Алексей Слепцов,

Чурапчы.