Чурапчыга “Боотур” байыаннай-патриотическай кулууп бастакы үөрэҕи тэрийдэ

Чурапчытааҕы физкултуура уонна успуорт үнүстүүтүн иһинэн быйыл тэриллибит “Боотур” байыаннай-патриотическай кулууп бэс ыйын саҥатыгар байыаннай полевой үөрэххэ баран кэлбитин туһунан «Саҥа олох” улуустааҕы хаһыат кэрэспэдьиэнэ Анна Захарова иһитиннэрэр.

— Бу хомуурга барыта аармыйаҕа сулууспалыы илик 13 устудьуон сырытта. Үнүстүүт преподователэ Иван Лукин хомууру салайда. Маннык тэрээһин сыала соруга диэн – аармыйа кэккэтигэр сулууспалыахтаах ыччаттарбытыгар бастакы өйдөбүлү иҥэрэр, онно бэлэмнээх буоларга уһуйар. Уолаттар байыаннай устаабынан эт-хаан өттүнэн, тактическай, строевой, огневой, химическэй бэлэмнэри аастылар.

Мындаҕаайыттан Аҕа дойду сэриитигэр кыттыбыт буойуннар уонна Социалистическай Үлэ Дьоруойа И. Р. Константинов пааматынньыктарыгар сырыттылар. Нэһилиэк устуоруйатын Терентий Кардашевскай сиһилии билиһиннэрдэ.

Бу бастакы саҕаламмыт суолталаах тэрээһин үгэскэ кубулуйан, сыл аайы ыытыллар буолуоҕа.