Чурапчыга борокуратуура ирдэбилинэн инбэлиит оҕо босхо эминэн-томунан хааччыллыаҕа

Чурапчы оройуонун борокуратуурата инбэлиит оҕо ийэ сайабылыанньатынан бэрэбиэркэни ыытта.

Силиэстийэ быһаарбытынан, ийэ уола хроническай ыарыһах уонна босхо бэриллиэхтээх мэдииссиинэ оҥоһуктарынан, эминэн-томунан тиһигин быспакка хааччыйыллыахтаах эбит.
Ол эрээри кэмигэр закупка ыытыллыбатаҕынан сибээстээн, инбэлиит оҕо мэдииссиинэ оҥоһуктарынан, эминэн-томунан хааччыллыбатах.

Борокуратуура Доруобуйа харыстабылын министиэристибэтин уонна Чурапчытааҕы киин балыыһаны бүддьүөт суотугар инбэлиит оҕону хааччыйар эбээһинэстэрин толорууну ирдээтэ. Суут борокуруор ирдэбиллэрин толору ылынна. Суут быһаарыыта сокуоннай күүһүгэр киирэ илик, диэн СӨ Борокуратууратын пресс-сулууспата иһитиннэрэр.