Чурапчыга быстах байыаннай хомуурга сылдьар ыччаттарбытыгар туһааннаах көмө уҕараабат

Хатылы нэһилиэгин дьаһалтата, эр дьон түмсүүтэ муус ылыытыгар күрэхтэһиини тэрийэн, нэһилиэнньэ кыаммат араҥатыгар, кырдьаҕастарга уонна быйыл күһүн быстах хомуурга ыҥырыллан барбыт уолаттар дьиэ кэргэттэригэр түҥэттилэр.

Бу нэһилиэктэн билигин 3 уол быстах байыаннай эпэрээссийэҕэ сылдьар. Нэһилиэк дьаһалтатын исписэлииһэ Ольга Степанова билиһиннэрбитинэн, нэһилиэк эр дьонун түмсүүтэ харчы хомуйан, биир бастакынан көмөтүн ууммут. Итини сэргэ Сомоҕолоһуу күнүгэр анаммыт кэнсиэртэн киирбит уонна нэһилиэк олохтоохторо бэйэлэрэ баҕа өттүлэринэн хомуйбут харчыларын, ону тэҥэ нэһилиэк дьаһалтата хас биирдии буойуҥҥа 20-лии тыһ. солк. анаабыт үбүн бу күннэргэ уолаттар тус счеттарыгар ыыппыттар.

Талбан Кириллов балаҕан ыйын 21 күнүгэр бэбиэскэ тутан, быстах байыаннай хомуурга хабыллыбыт. Хабаровскай куоракка тиийэн, кылгас кэмҥэ анал бэлэмнэниини ааһан, Мариопольга барбыт.

Ийэтэ Ирина Гаврильевна билиһиннэрбитинэн, уолунаан дөрүн-дөрүн сибээстэһэллэр.

“Уолум Талбан спецназ идэлээх буолан, биир сиргэ тохтоппокко, көһөрө сылдьаллар. Соторутааҕыта Ростов на Дону тиийбит этэ. Бу иннинэ Мариопольга сылдьыбыта. Өр соҕус буола-буола сибээстэһэбит.

Хаһан да маннык түгэҥҥэ түбэспэтэх буолан, бастаан утаа, олус долгуйбутум. Улууспут дьаһалтатын баһылыга Степан Саргыдаев уонна туһааннаах тэрилтэ салайааччылара, үлэһиттэрэ быстах байыаннай хомуурга барбыт ыччаттар дьиэ кэргэннэрин, төрөппүттэрин кытта көрсөн, истиҥник кэпсэтэн, туох кыһалҕалаахпытын билсибиттэрэ. Сонно тута тустаах көмөлөрүн оҥорбутунан барбыттара. Бу соторутааҕыта өрөспүүбүлүкэттэн көрүллэр биир кэмнээх көмөнү – 200 тыһ. солк. туппуппут. Түөрт уол оҕолоохпун. Талбан –бастакы оҕом буолар. Биир уолум – туһунан ыал. Икки кыраларбыныын олоробут. Хатылыга оһоҕунан оттуллар дьиэлээх буолан, бииргэ төрөөбүттэрим сүбэлэринэн, дойдубар Төҥүлүгэ кэлэн кыстаан олорбун. Кэлээппин кытта үлэ булан биэрэн, кафеҕа үлэлии сылдьабын. Хатылым уонна Төҥүлүм дьоно бука бары болҕомто ууран, туох кыһалҕалаахпын сураһан, куруук көмөлөһө, билсэ олороллор.

Онон Өрөспүүбүлүкэбит салалтатыгар, Чурапчы улууһун, Хатылы уонна Төҥүлү нэһилиэктэрин дьаһалталарыгар, биир дойдулаахтарбар, туһааннаах бары тэрилтэлэргэ уо.д.а. бары көмөлөрүн ууммут дьоҥҥо улахан махталбын тиэрдэбин. Оҕом Ийэ дойдутугар ытык иэһин төлөөн, этэҥҥэ эргиллэн кэлэрин эрэнэ кэтэһэбин. Быстах байыаннай хомуурга ыҥырыллан барбыт байыастар дьиэ кэргэннэригэр кытаанах санааны, тулууру баҕарабын”, — диэн Ирина Гаврильевна Кириллова санаатын үллэһиннэ.

Кырдьыга да, маннык уустук кэмнэргэ бары биир санааҕа түмсэн, бэйэ-бэйэҕэ көмөлөсүһэн олоруоҕуҥ, ыччаттарбыт кыайыы көтөллөөх төрөөбүт дойдуларыгар этэҥҥэ эргиллэн кэлэллэригэр баҕарыаҕыҥ.

Анна Захарова, саҥаолох.рф