Дьиэ кэргэҥҥэ элбэх өҥөнү оҥорор киин Чурапчыга аһыллыаҕа

Ахсынньыга Чурапчытааҕы сокуоннай саастарын туола илик оҕолору социальнай-реабилитациялыыр киин баазатыгар Саха сиригэр бастакы Дьиэ кэргэҥҥэ элбэх өҥөнү оҥорор киин аһыллыаҕа. 

Бу киин РФ үлэҕэ, социальнай сайдыыга министиэристибэтэ уонна Ыарахан балаһыанньаҕа түбэспит оҕолору өйүүр пуонда 2022 сылтан тэрийэр пилотнай бырайыактарын чэрчитинэн аһыллар кыахтанна.

Дьиэ кэргэҥҥэ элбэх өҥөнү оҥорор кииҥҥэ тиийэн кэлэн, төлөпүөнүнэн, эбэтэр, интэриниэтинэн кэпсэтэн, көмөнү ылыахха сөп. Ыарахан балаһыанньаҕа түбэспит дьиэ кэргэттэргэ психологтар, социальнай педагогтар, атын да исписэлиистэр көмөлөһүөхтэрэ.

Дьиэ кэргэттэргэ элбэх өҥөнү оҥорор киин тугунан көмөлөһөрүй?

• «Госуслуги» портал нөҥүө социальнай көмөнү ыларга, сайабылыанньа суруйарга;
• психолог, логопед консультациялара;
• социальнай төлөбүрдэри хайдах ыларга көмөлөһөн, сүбэлээн биэрэллэр;
• оҕо-төрөппүт сыһыаннарыгар үөскүүр кыһалҕалары быһаараллар;
• төрөппүттэр уонна оҕолор интэриэстэринэн кулууптары тэрийэллэр;
• оҕолору сайыннарар уонна чэбдигирдэр, чөлүгэр түһэрэрдьарыктары ыыталлар;
• каникул кэмигэр оҕолору көрөр-истэр, дьарыктыыр бөлөхтөрү тэрийэн үлэлэтэллэр.