Салгыы
Чурапчыга диэри аспаал суол кэллэ

Чурапчыга диэри аспаал суол кэллэ

07.10.2022, 13:23
Бөлөххө киир:

Аллараа Бэстээхтэн Чурапчыга диэри Халыма федеральнай суол аспаалланан бүттэ. Бүгүн, алтынньы 7 күнүгэр, Ил Дархан Айсен Николаев, Суол федеральнай агентствотын салайааччытын солбуйааччы Игорь Костюченко суолу үөрүүлээхтик астылар.

Санатан эттэххэ, “Халыма” федеральнай суол Саха сирин уонна Магадан уобалаһын хабар, уопсай уһуна 1980 км. Федеральнай бырагырааманан 2019 сылтан барыта 450 км суол оҥоһуллуохтааҕа. Быйыл Магадан уобалаһыгар 200 км, Саха сиригэр 160 км оҥоһулунна. Аллараа Бэстээхтэн Чурапчыга диэри суол аспаалланна.

  Бүгүн өрөспүүбүлүкэбит суолларын историятыгар эмиэ биир умнуллубат күн буолла. Аллараа Бэстээхтэн Чурапчыга диэри өр күүтүллүбүт суол бүгүн үлэҕэ киирдэ. Салгыы бу суол 2025 сылга диэри, былаан быһыытынан, Ытык Күөлгэ тиийиэхтээх. Онтон 2030 сылга диэри Хаандыгаҕа диэри оҥоһуллуоҕа, Алдан өрүһү туоруур улахан муоста тутуллуоҕа. Манна даҕатан эттэххэ, кэлиҥҥи сылларга биһиги өрөспүүбүлүкэбитигэр хаһааҥҥытааҕар да элбэх суол оҥоһулунна. Сыл аайы 500-тэн итэҕэһэ суох килэмиэтир суолу үлэҕэ киллэрэбит. Быйыл да былааммыт 500-чэкэ килэмиэтир. Бу федеральнай суол аспаалланарын Егор Борисов Ил Дарханныы олорон улаханнык туруорсан турар, бастакы олугу уурбута. Ол салҕанан 2019 сылтан үс сыл иһигэр аспаал суол Чурапчыга кэллэ. Чурапчы, Мэҥэ Хаҥалас олохтоохторун суол үөрүүлээх аһыллыытынан итиитик-истиҥник эҕэрдэлиибин, — диэн эттэ Ил Дархан.

Халыма суолугар 2027 сылга диэри сүүс тыһыынчаттан тахса килэмиэтир суолу оҥоруохтаахтар. Санатан эттэххэ, РФ бэрэсидьиэнэ Владимир Путин Анал этиитигэр эрэгийиэннэр суолларын оҥорууга, өрөмүөннээһиҥҥэ ураты болҕомтону ууран турар.

Билигин хаачыстыбалаах куттала суох суоллары оҥоруу национальнай бырайыагынан үгүс эрэгийиэҥҥэ суоллар оҥоһуллаллар. Быйыл да биһиги уопсай тиэмпэбитин сүтэрбэтибит. 163 мөлүйүөн кв килэмиэтир суол оҥоһуллуохтаах. Билигин РФ бэрэсидьиэнэ, бырабыыталыстыбата эрэгийиэннэр суолларыгар улахан болҕомтолорун уураллар, үбүлээһинэ да эбилиннэ. Ол үтүө холобурун бу бүгүн көрдүбүт, Саха сиригэр саҥа аспаалламмыт суол аһылынна. , — диэн бэлиэтиир суол үөрүүлээх аһыллыытыгар Игорь Костюченко.

Мэҥэ Хаҥалас, Чурапчы улуустарын олохтоохторо үөрүүлэрэ үгүс. Чурапчы олохтооҕо Афанасий Дьячковскай бэлиэтииринэн, саҥа суолунан Аллараа Бэстээххэ диэри айан быдан кылгаабыт.

— Бу суолбут оҥоһулларын наһаа өр кэтэспиппит. Эһиги бэйэҕит да билэҕит, Халыма суола бу сыллар тухары саамай мөлтөх туруктааҕынан биллэн кэллэ, киин телевидениеҕа кытары тахса сылдьыбыта. Урут сайын үс аҥаартан итэҕэһэ суох чаас айаннаан Аллараа Бэстээххэ тиийэр этибит, билигин балтараа-икки чааһынан биэрэккэ тиийэбит. Онон мантан ыла көнө, быыла суох аспаал суолунан айанныыр буоллубут диэн үөрэн олоробут. Ол эрээри, этиэхпин баҕарабын, суолга сэрэхтээх буолуоххайыҥ, суолбут үчүгэй буолла дии-диибит мээнэ-мээнэ ыытымыаххайыҥ. Ил Дархаммытыгар Айсен Николаевка, биир дойдулаахпытыгар, сенаторга Егор Борисовка махталбыт улахан, — диэн махталын тириэрдэр кини.

Бары сонуннар
Салгыы
9 февраля
  • -48°C
  • Ощущается: -48°Влажность: 63% Скорость ветра: 1 м/с

Сообщить об опечатке

Текст, который будет отправлен нашим редакторам: