Чурапчыга экологтар уһуйаан оҕолорун үөрэтэллэр

Чурапчы улууһун айылҕа харыстабылын судаарыстыбаннай иниспиэксийэтин кэлэктиибэ үүнэр көлүөнэни тулалыыр эйгэни харыстыырга иитии чэрчитинэн үөрэтиини ыытар. Бу туһунан СӨ экологияҕа министиэристибэтэ иһитиннэрэр.

Бүгүн, тохсунньу 27 күнүгэр, П.И. Борисова аатынан «Улыбка» оҕо уһуйааныгар ыстаарсай судаарыстыбаннай иниспиэктэр Олег Оконешников уонна айылҕа ураты харыстанар сирдэрин, заповедниктарын судаарыстыбаннай иниспиэктэрэ Владимир Павлов 25 иитиллээччигэ экоуруок ыыттылар. Иниспиэктэрдэр «Улууска баар харамайдар» диэн тиэмэҕэ викторина ыыттылар уонна экологическай мулькиинэ көрдөрдүлэр.

Кырачаан оҕолор ураты болҕомтолорунан уонна интэриэстээхтэринэн экологтары сөхтөрдүлэр. Көрсүһүү түмүгүнэн экологтар уһуйааҥҥа энциклопедия уонна экологическай букубаар бэлэхтээтилэр. Үөрбүт оҕолор бэлэҕи үөрэ-көтө ыланнар, тута көрбүтүнэн бардылар.

Айылҕа харыстабылын култууратын оҕоҕо кыра эрдэҕиттэн иҥэриэххэ наада, тоҕо диэтэххэ, тулалыыр эйгэни харыстыыр ​​баҕа санаа оҕо саастан үөскүүр!