Бэҕэһээ, муус устар 1 күнүгэр, Чурапчыга Имигиттэ күөлүгэр «Хаар айан-Саха сирин кубога» өрөспүүбүлүкэтээҕи чөмпүйэнээт буолла.
Бу 20-с төгүлүн ыытыллар күрэхтэһии Чурапчы нэһилиэгин 375, «Колми» ХЭТ 30 сыллара туолуутугар ананна. Манна барыта 51 хамаанда (экипаж) кыттыыны ылла. Ыраах Өлөөн улууһуттан кытары бааллар. Өлүөхүмэ, Ленскэй, Үөһээ Бүлүү, Ньурба, Хаҥалас, Таатта, Мэҥэ Хаҥалас, Уус Алдан, Нам улуустарыттан хамаандалар ох курдук оҥостон кэлбиттэрэ күрэхтэһии сытыытык барарын мэктиэлээтэ. Чурапчы улууһуттан 13 хамаанда кытынна. Дьахталлар биэс хамаанданан күрэхтэстилэр.
Күрэхтэһиини үөрүүлээхтик аһыыга Чурапчы улууһун баһылыга Степан Саргыдаев, Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Георгий Степанов, «Колми» хампаанньа салайааччыта Николай Румянцев, Чурапчы нэһилиэгин баһылыга Влалимир Сивцев, бу күрэхтэһиини төрүттээбит, бүгүҥҥү күрэс кылаабынай судьуйата Иннокентий Барашков, о. д. а. эҕэрдэ тыл эттилэр.
Кинилэр «Хаар айан» кэҥээн, кыттааччыта элбээн иһэрин бэлиэтээтилэр. Ол курдук, бастаан Чурапчыга 14 массыына кыттыбытын, бирииһэ УАЗ массыына көлүөһэтин кэмпилиэгэ этэ диэн аҕыннылар. Бу күрэхтэһии супер-бирииһинэн «Нива-Легенд» массыына буоларын эттилэр. Бырайыак Россия автомобилистарын федерациятынан биһирэммитин, кыайыылаахтарга спортивнай разрядтар иҥэриллэллэрин иһитиннэрбиттэрэ сүргэни көтөхтө. Ааспыт күрэхтэһии кыайыылаахтарыгар успуорт маастара, маастарга кандидат, разрядтар иҥэриллибиттэрин дохсун ытыс тыаһыгар доҕуһуоллатан туттардылар. Тэрийээччилэр наҕараадаланыылара үөрүүнү-көтүүнү үксэттэ.
Күрэхтэһиигэ массыыналар үбүлүөйдээх дааталарга анаан киэргэтиллибиттэрэ учуоттанна. Тоҥуу хаарынан сүүрдүү анал түһүмэхтэринэн ыытылынна. «Драг-рейсинг», «»Партнерские гони», «Кольцевая гонка» түһүмэхтэргэ кыайбыттар сүүмэрдэнэн, «Супер-экстрим гонки» түмүктүүр түһүмэххэ 12 хамаанда киирсэн, эрбии тииһин курдук эгил-тэгил эриһэн, ким кыайыылааҕынан тахсарын быһаарыстылар. Түмүккэ, Таатта улууһун «Форвард» хамаандата кыайыылаах тахсан үөрүү-көтүү өрөгөйө буолла. Иккиһи эмиэ Таатта хамаандата, үсүһү Чурапчы хамаандата ыллылар.
Дьахталларга туһунан «Автоледи драг-рейсинг» буолла. Илин-кэлин түсүһүү кэнниттэн, кыайыылаахтар билиннилэр. Кинилэр анал бириистэринэн наҕараадаланнылар.
Күүрээннээх күрэхтэһии кэмигэр сүүйүүлээх оонньуу ыытыллыбытыгар, Чурапчы ыччата Анатолий Федоров «УАЗ-патриот» хаһаайынынан буолла.
Көрөөччүлэргэ анаан сылаас чэй, кофе, шашлык, алаадьы, бэрэски, о.д.а. атыы тэриллэн, дьон тарҕаспакка күрэхтэһиини астына, дуоһуйа кэтээн көрдүлэр. Суол эрэйэ суох сылдьарга анаан астарыллыбытын, массыыналар турар былаһааккалара бэлэмнэниллибитин, көрөргө, сынньанарга усулуобуйа толору тэриллибитин иһин махталларын биллэрдилэр.
Алексей Слепцов,
Чурапчы.
Дьокуускайга Ойуунускай уулусса 20/1 дьиэтэ 45 сыллааҕыта тутуллубута. Саха Өрөспүүбүлүкэтигэр Элбэх кыбартыыралаах дьиэлэри хапытаалынайдык өрөмүөннээһин…
Социальнай ситимнэринэн Птицефабрика оройуонугар видео тарҕаммыт. Ролик ааптардара Дьокуускай таһыгар хаарга тыҥырахтаах атах суолун тыатааҕы…
Сэтинньи 4 күнүттэн Дьокуускайга элбэх оҕолоох ыаллар 1-11 кылаастарга үөрэнэр оҕолоро босхо айанныахтара. Ол туһунан…
Тэрээһиҥҥэ Жатайдааҕы суудунаны тутар тэрилтэ генеральнай дириэктэрэ Влад Михайлович Пермяков, Жатайдааҕы тиэхиньикум дириэктэрэ Владимир Иванович…
Бырабыыталыстыба Бэрэссэдээтэлэ Кирилл Бычков туһааннаах структуралары уонна тиэйээччилэри кытта мунньахха “Жатай-Төхтүр” туорааһынын түргэтэтэргэ соруйда. Билигин…
Бүгүн Дьокуускай куорат олохтоохторо Хомсомуол болуоссатыгар тоҕуорустулар. Манна үс күн устата, алтынньы 25-27 күннэригэр “Рыба…