Чурапчыга харах быраастарын биригээдэлэрэ үлэлииллэр

Бу күннэргэ өрөспүүбүлүкэтээҕи харах клиническэй балыыһатын быраастара лазернай эпэрээссийэни оҥорор оборудованиелаах Дьокуускай куораттан кэлэн үлэлии сылдьаллар.

Ол курдук икки быраас, икки сиэстэрэ, Нюргуяна Егоровна Эбиль, Анна Васильевна Филатова муус устар 13-16 күннэригэр Чурапчы нэһилиэгин Таас балыыһатын Саха АССР үтүөлээх бырааһа Григорий Алексеев аатынан хирургическай отделениетыгар  дьону көрдүлэр, салгыы эмтэнэллэригэр сүбэ-ама биэрдилэр.

Прокопий Сокольников аатынан Чурапчытааҕы киин балыыһа 1-кы категориялаах окулист бырааһа Диана Сотникова Чурапчы нэһилиэгэр үлэ хаамыытын билиһиннэрдэ: “Биһиэхэ офтальмохирургическай биригээдэ кэлэн кыһалҕалаах дьоммутугар эпэрээссийэ оҥоро сылдьаллар. Барыта холбоон 47 киһи хараҕын оҥороллор, кинилэр истэриттэн 19 киһи катаракта ыарыыны утары икки харахтарын эпэрээссийэлэтэллэр, оттон аҥаар харахтарыгар 28 ыарыһах. Муус устар 14 күнүгэр 39 эпэрээссийэ оҥоһулунна. Бэйэбит улууспутугар эрдэттэн ыарыһахтары көрөн саҕалаабыппыт, туох баар анаалыстарын ыламмыт, сөптөөх докумуоннары барытын толорон, ыарыыларын устуоруйаларын бэлэмнээбиппит. Быраастар бастакы күн кэлэннэр барыларын көрдүлэр. Иккис күнтэн эпэрээссийэ саҕаланна. Бу кэнниттэн, эмтэммит дьоммут бары биһиэхэ салгыы көрдөрөллөр, ким-туох ыйытыктааҕынан кэлэннэр поликлиникаҕа көрдөрүнэллэр. Харах быраастара Чурапчы улууһугар куораттан бу иннинэ 2015 сыллаахха сылдьыбыттара. Инникитин сылга биирдэ кэлэннэр өссө төгүл үлэлиэхтэрэ. Бу иннинэ Хаандыгаҕа, Тааттаҕа сылдьыбыттар”.

Ыстатыйа https://санаолох.рф/ ылылынна