Чурапчыга ититэр ситим тоҕо барбыт

Бэҕэһээ Чурапчы сэлиэнньэтигэр  «Спортивнай»  хочуолунай  ититэр ситимигэр уу дабылыанньата эмискэ түспүтүн туһунан суһал иһитиннэрии киирбитэ.

Оҕо саадыгар тиийэр ситимҥэ саахал тахсан, уу тоҕо барбыта тута биллибит.  Ити ситимтэн 27 чааһынай уонна элбэх кыбартыыралаах икки дьиэлэр уонна оҕо саада итиинэн хааччыллаллар эбит. Тута тустаах тэрилтэлэр саахалы туоратыыга ылсыбыттар уонна бэҕэһээ киэһэ 23:30 чааска сыбааркалыыр үлэни түмүктээбиттэр.

«Саахала туоратыыга 14 киһи уонна 4 тиэхиньикэ үлэлээтэ. Кэмигэр сөптөөх миэрэ ылыллан, барыта этэҥҥэ. Дьиэлэр тоҥмотулар», — диэн  Чурапчы улууһун баһылыга Степан Саргыдаев иһитиннэрдэ.