Чурапчыга Иван Лебедев “История на холсте” диэн быыстапката аһылынна

Хоту көһөрүллүү күнүн бэлиэтиир тэрээһиннэр чэрчилэринэн, Чурапчыга “Айылгы” НАДь фойетыгар  Саха сиригэр соҕотох баталист-худуоһунньук Иван Лебедев “История на холсте” (“Холустаҕа – история чахчыта») персональнай быыстапката аһылынна.

Быыстапка аһыллыытын үөрүүлээх чааһыгар улуус дьаһалтатын баһылыгын бастакы солбуйааччы Рустам Данилов, улуус култуураҕа салаатын методическэй киинин салайааччыта Мария Васильева, Хатылы нэһилиэгин баһылыга Вячеслав Попов, Иван Лебедев олоҕун аргыһа Елена Михайловна, бииргэ үөрэммит доҕотторуттан Екатерина Лыткина тыл этиилэригэр ол суоһар сылларга Чурапчы колхуостарын дьонун күүс өттүнэн көһөрүүнү история кырдьыгар тирэнэн, бу баардыы дьүһүйбүт худуоһунньукка махтал истиҥ тыллара этилиннилэр.

Иван Иванович бэйэтэ историк идэлээх, 60-нугар диэри атын эйгэҕэ үлэлээн баран, П.П. Романов аатынан Дьокуускайдааҕы ойуулуур-дьүһүннүүр колледж базатыгар «станковая живопись” анал  бырагырааматынан үөрэммит идэлээх худуоһунньук. Кини суруйбут батальнай болотуналара сэрии хонуутун дьиҥ чахчы дьүһүйэн көрдөрөллөр. Кини сүрүннээн Аҕа дойду сэриитигэр саха норуотуттан тахсыбыт геройдары, историческэй кыргыһыылары суруйар диэн  @churapchinsky ТГ-ханаалга иһитиннэрдилэр.