Чурапчыга култуура тутуулара саҥардыллыахтара

Ханна да саҥардан, тупсаран оҥоруу үлэлэрэ тиһиктээхтик ыытыллаллар, улахан сэргэхсийиини таһаараллар. Чурапчылар ити үлэттэн туора турбаттар.

Култуура дьиэтэ Бахсыга 2024 сыл бүтүүтүгэр дьэндэйиэ. Маныаха, Саха сиригэр Култуура, литература уонна ускуустуба күннэрин иитинэн, Чурапчы улууһугар эбийиэги тутуу саҕаламмытын туһунан өйдөбүнньүк бэлиэ баар буолла.

«Өрөспүүбүлүкэни сайыннарар туһугар култуура уонна социальнай эйгэ эбийиэктэрэ тиһиктээхтик тутуллуохтаахтар.  Бу сылларга биһиги аҕыйаҕа суоҕу туттубут уонна култуура тэрилтэлэрин куораттарга, оройуон кииннэригэр эрэ буолбакка, сэлиэнньэлэргэ кытары тутуу ыытылларын салгыыбыт«, — диэн Ил Дархан Айсен Николаев бэлиэтээн турар.

Саҥа дьиэ «Култуура» национальнай бырайыак иитинэн тутуллар. Билигин тутуу матырыйааллара тиэйиллэллэр. Быйыл дьиэ көҥдөйө түмүктэниэ, инженернэй ситимнэргэ холбонуо.

Маны таһынан, Хайахсыкка аныгы «ЭкстраСинема» проектор туруоруохтара уонна киинэ тыйаатырын оҥоруохтара.

Өссө, СӨ Култуура министиэристибэтин кытта бииргэ оройуон тэриллибитэ 375 сылынан, норуоттар икки ардыларынааҕы таһымнаах Ыһыах оҥорор туһунан быһаарыы ылыннылар.

Бэлиэ тэрээһин иитинэн ыытыллыбыт «төгүрүк остуолга» улуустар уонна бөһүөлэктэр култуураҕа дьиэлэрин саҥардан оҥоруу уонна национальнай бырайыактарга кыттыы туһунан  боппуруостары дьүүллэстилэр.

Үүнэр көлүөнэ тыйаатыра РФ — Педагог уонна уһуйааччы, СӨ — Үлэ сылларынан, Василий Яковлев — Далан төрөөбүтэ 95 сылынан «Дьикти саас» испэктээги көрдөрдө. Оттон бүгүн, муус устар 5 күнүгэр, үҥкүү национальнай тыйаатырын «Благословение Земли Олонхо» улахан кэнсиэринэн тэрээһин түмүктэнэр.

СӨ Ил Дарханын уонна Бырабыыталыстыбатын пресс-сулууспата