Чурапчыга Куохара үрэх кытылын тупсарыахтара

Чурапчы сэлиэнньэтигэр Куохара үрэх кытылын тупсарыы 2026–2027 сылларга саҕаланыаҕа. Бырайыак Арассыыйа бэрэсидьиэнэ Владимир Путин көҕүлээһининэн ыытыллыбыт «Олоххо-дьаһахха  инфраструктура» национальнай бырайыагын чэрчитинэн, «Куорат табыгастаах эйгэтин оҥоруу» федеральнай бырагырааманан олоххо киирэр. Ону олоххо киллэрэргэ 50 мөлүйүөн солкуобай федеральнай үп көрүллүөҕэ.

Куохара үрэх кытыла сэлиэнньэ киининэн, саҥа тутуллубут түөлбэттэн уонна араас тэрилтэлэртэн чугас баар. «Халыма» федеральнай трассаттан чугас буолан, бу сир олохтоохтору эрэ буолбакка, туристары эмиэ угуйуоҕа. Манна араас  табыгастаах сир оҥоһуллуоҕа: сэргэҕэ майгынныыр стелалаах киирэр аан, худуоһунньук Афанасий Мунхалов кэриэһигэр «Графика» пирс, массыына туруорар сир, сылаас павильоннаах уонна аһаҕас террасалаах кафе, кэрэ көстүүлээх былаһаакка уонна фонтан, тэрээһиннэр ыытыллар сирдэрэ, оонньуур сир, уонна спортивнай былаһаакка.

Архитектура бу дойду историятын уонна култууратын көрдөрөр, үгэс буолбут дьиэ көрүҥнэрин, киэргэтиини уонна айылҕа тутуу матырыйаалларын киллэрэр. Тутааччы – «Алаас» хампаанньа, үлэни Ил Дархан иһинэн архитектура, тутуу киинэ уонна Территория сайдыытын компетенциятын киинэ хонтуруоллууллар.

Бырайыак 10-с Бүтүн Арассыыйатааҕы табыгастаах куорат эйгэтин оҥорууга бастыҥ бырайыактар ​​куонкурустарын чэрчитинэн, Уһук Илиҥҥи федеральнай уокурук субъектарыгар ыытыллыбыт 4-с куонкуруска кыайыылаахтартан биирдэстэринэн буолбута. Куонкурус түмүгэ атырдьах ыйыгар Казань куоракка биллибитэ. Саха сирэ 420 мөл.солк. суумалаах 7 бырайыагы үбүлээһиҥҥэ кыайбыта. Онон Тиксии, Эдьигээн, Ленскэй, Бороҕон, Уус  Маайа, Ытык Күөл, Чурапчы болуоссаттарын уонна кытыл уулуссаларын тупсарыы ыытыллыаҕа.

Олохтоохтор национальнай бырайыактар ​​көмөлөрүнэн улууска олох-дьаһах табыгастаах, аныгылыы буолан иһэрин бэлиэтииллэр. Оҕолоох дьиэ кэргэттэр саҥа сынньанар уонна хаамар сирдээх, эдэр ыччат спортивнай уонна оонньуур былаһааккалаах, оттон саастаах дьон алтыһар, табыгастаах уонна кэрэ миэстэлээх буолуохтара.

Арассыыйа бэрэсидьиэнэ Владимир Путин куорат сайдыыта гражданнар олохторун хаачыстыбатыгар, социальнай уонна тырааныспар өҥөлөрүнэн туһаныыга, үлэ миэстэтин таһаарыыга быһаччы сибээстээх диэн хаста да тоһоҕолоон эппитэ. Бэрэсидьиэн Ыйааҕынан, табыгастаах уонна куттала суох эйгэни тэрийии 2030 сылга диэри уонна салгыы дойду сайдыытын национальнай сыалларын ахсааныгар киирэр.

Саха сиригэр «Создание комфортной городской среды» бырагыраама 2019 сылтан үлэлиир. Бу кэм устата 3,119 миллиард солк. суумалаах  101 уопсастыбаннай болуоссат тупсарыллыбыта.  2024 сылга эрэ 941 мөлүйүөнтэн тахса солкуобай суумалаах 24 бырайыак үлэҕэ киирбит.