Чурапчыга “Мунхалов ааҕыылара” тэрээһин саҕаланна

Бүгүн Чурапчыга худуоһунньук, П.А. Ойуунускай аатынан Судаарыстыбаннай бириэмийэ бастакы лауреата Афанасий Петрович Мунхалов төрөөбүтэ 90 сылыгар анаммыт эрэгийиэннээҕи “Мунхалов ааҕыылара” икки күннээх научнай-практическай кэмпириэнсийэ үлэтин саҕалаата.

Бу туһунан Чурапчы улууһунааҕы култуура управлениетын салайааччыта Петр Гуляев маннык сырдатта:

— Суолталаах тэрээһиҥҥэ Владивостоктааҕы Третьяковскай галерея филиалын научнай отделын сэбиэдиссэйэ, искусствовед, Арассыыйа худуоһунньуктарын сойууһун чилиэнэ Ольга Зотова, Худуоһунньуктар сойуустарын Хотугулуу-Илиҥҥи федеральнай уокурук Саха сиринээҕи салаатын бэрэссэдээтэлэ Ольга Скорикова,   АГИКИ живопись кафедратын сэбиэдиссэйэ, СӨ ускуустубатын үтүөлээх диэйэтэлэ Туйаара Шапошникова, Афанасий Петрович төрөппүт кыыһа Лена Мунхалова, Арктическай ускуустуба уонна култуура институтун преподавателлэрэ уонна устудьуоннара кыттыыны ыла кэллилэр.

Икки күн устата улахан дьон уонна оҕолор үс сиэксийэнэн үлэлиэхтэрэ.

Ол курдук,  кэмпириэнсийэ кыттыылаахтара  Афанасий Мунхалов олоҕун уонна айар үлэтин, Саха сирин уонна Арассыыйа худуоһунньуктарын, ону таһынан аныгы ускуустуба уонна дизайн көмөтүнэн территориялар социальнай-култуурунай уратыларын оҥоруу хайысхаларыгар бэйэлэрин бырайыактарын көмүскүөхтэрэ.

Кыттааччыларга ситиһиилэри,  сонун көрүүлээх сүүрээннэри тобуллалларыгар баҕарабыт.