Чурапчыга оҕо эчэйбитинэн успуорт оскуолата 100 тыһ.солк. төлүөҕэ

Саха сирин Үрдүкү суута Чурапчытааҕы суут бириигэбэрин уларыйыыта суох хаалларда. Онон Д. П. Коркин аатынан олимпийскай резервэ успуорт оскуолатын-интэринээтэ уруок кэмигэр эчэйбит оҕо эчэйбитинэн, 100 тыһыынча солкуобайдаах моральнай хоромньуну уонна судаарыстыбаннай пошлинаҕа үс тыһыынча солкуобайы төлүөҕэ.

Саха сирин Үрдүкү суутун пресс-сулууспата иһитиннэрэринэн, быһылаан былырыын балаҕан ыйын 10 күнүгэр буолбут. Оҕо физкултуура уруогун кэмигэр эмсэҕэлээбит. Ол түмүгэр уол оҕо хаҥас хомурҕынан уҥуоҕун тоһуппут. Эмсэҕэлээччи ийэтэ суута суох дьыаланы быһаара сатаабыт да, өрүттэр сөбүлэспэтэхтэр. Спортивнай оскуола бэрэстэбиитэлэ уол оҕо Дьокуускайга күрэхтэһиигэ кыттан эчэйбитэ буолуо диэн сабаҕалаабыт. Ол эрээри, бу быһаарыыны суут ылымматах.