Чурапчыга «Судостроение» кылааһа үөрүүлээхтик аһылынна

Бу күннэргэ С.А. Новгородов аатынан Чурапчы орто оскуолатыгар «Судостроение»  хайысхалаах кылаас үөрүүлээх быһыыга-майгыга аһылынна. Кылаас СӨ Ил Дарханын 2023 сыл ахсынньы 30 күнүнээҕи 177 №-дээх «2030 сылга диэри Саха Өрөспүүбүлүкэтин үөрэхтээһинин биир кэлим тиһигин сайыннарыы туһунан» ыйааҕын олоххо киллэрии түмүгэр, ону таһынан үс өрүттээх сөбүлэҥ түһэрсиллибитинэн сибээстээх, диэн Үөрэх министиэристибэтин пресс-сулууспата суруйар.

Үөрүүлээх тэрээһин ыалдьыттары көрсүүттэн саҕаланна. Сахалыы таҥастаах үөрэнээччилэр кыттааччылары эҕэрдэлээн, саха аһынан күндүлээн, алгыс сиэрин-туомун толордулар. Актовай саалаҕа оскуола салалтатын, муниципальнай былаас бэрэстэбиитэллэрин уонна бырайыак партнердарын эҕэрдэ тыллара иһилиннэ.

Тэрээһин чэрчитинэн ахсыс кылаас 20 үөрэнээччитэ «Судостроение»  кылаас үөрэнээччитин туоһу суругун тутта уонна үөрэххэ, уопсастыба иннигэр сулууспалыырга бэлэмнэрин бигэргэтэн, андаҕар тылы эттилэр. Итини сэргэ, эрэгийиэн аал оҥорор салаатыгар үрдүк квалификациялаах каадырдары бэлэмнииргэ туһуламмыт, оскуола выпускниктарын тус сыаллаах үөрэххэ ылыы туһунан эбии сөбүлэҥҥэ илии баттанна. Кыһыл лиэнтэни быһыы үөрэнээччилэр билиилэрин сайыннарарга уонна идэни талыыга туһуланар саҥа үөрэх эйгэтин арыллыытын бэлиэтинэн буолла. Үөрэнээччилэргэ бастакы уруогу Жатайдааҕы тиэхиньикум преподавателэ Александр Афанасьев ыытта. Онон тэхиниичэскэй идэҕэ интэриэһи үөскэтэр уонна билиилэрин дьиҥ олоххо иҥэрэр уруоктар тиһигэ саҕаланна.

«Судостроение»  кылааһа – көннөрү үөрэхтээһин көҕүлээһинэ буолбатах, бу өрөспүүбүлүкэ каадырын кыаын үөскэтиигэ стратегическай хардынан  буолар. Бырайыак былаас, үөрэхтээһин уонна бырамыысыланнас күүстэрин түмэн, Саха Өрөспүүбүлүкэтин аал оҥорор салаатын сайдыытыгар кылааттарын киллэрэр кыахтаах кэскиллээх исписэлиистэри бэлэмниир бигэ туруктаах моделы олохтуур.