Чурапчыга суһал көмө массыыната түҥнэстибит

Чурапчы улууһугар суһал көмө массыыната түҥнэстибит. Чурапчытааҕы киин балыыһаттан ЯСИА-ҕа иһитиннэрбиттэринэн, икки киһи эчэйбит. Инсууллаах ыарыһаҕы санрейсынан Дьокуускайга ыыппыттар.

Быһылаан атырдьах ыйын 7 күнүгэр киэһэ Мырыла сэлиэнньэтин таһыгар тахсыбыт. Саахалга ыарыһах эчэйбэтэх. «Икки дьахтар эчэйдэ: быраас уонна инсууллаах ыарыһаҕы арыаллаһан испит киһи. Билигин кинилэр туруктара үчүгэй. Биир дьахтары бүгүн балыыһаттан таһаардылар, оттон иккис эчэйбит дьахтар хомурҕанын уҥуоҕун тоһуппут, кини сарсын тахсыаҕа. Инсууллаах ыарыһаҕы, былаан быһыытынан, санрейсынан Дьокуускайга ыыппыттара», — диэн Чурапчытааҕы киин балыыһаттан  иһитиннэрдилэр.