Чурапчыга сураҕа суох сүппүт саллааттары кэриэстиир тэрээһин буолла

Ахсынньы 3 күнэ — Арассыыйа үрдүнэн сураҕа суох сүппүт саллааттары кэриэстиир бэлиэ күн. Бүгүн Чурапчы улууһугар умуллубат уот аттыгар мемориалга улуус, нэһилиэк салалтата, тэрилтэ салайааччылара, эдэр ыччаттар, дьон-сэргэ мустан өйдөбүнньүк бэлиэтин — сибэкки дьөрбөтүн уурдулар. Бу туһунан Чурапчы улууһун дьаһалтата иһитиннэрэр.

Тэрээһини улуустааҕы Албан аат түмэлин дириэктэрэ Владимир Дьячковскай иилээн-саҕалаан ыытта. Дьокутааттар сэбиэттэрин бэрэссэдээтэлэ Яков Оконешников, улуус баһылыгын бастакы солбуйааччыта Рустам Данилов, нэһилиэк баһылыга Владимир Сивцев тыл эттилэр.

Кинилэр үүнэр көлүөнэҕэ өйдөтүү, үйэтитии үлэтин ыытар, сэрии толоонугар дьоруойдуу охтубут, сураҕа суох сүппүт буойуттар хорсун быһыыларын, эйэлээх халлаан иһин кыргыспыт албан ааттаах олохторун суолун үйэлэргэ өлбөөдүппэккэ сылдьарбыт биһиги ытык иэспит диэн тоһоҕолоотулар итиэннэ билиҥҥи кэмҥэ анал байыаннай дьайыыга дойдубут туһугар туруулаһа сылдьар саллаат уолаттарбыт кыайан-хотон эргиллэллэригэр, сураҕа суох сүппүттэр көмүс уҥуохтара көстөрүгэр баҕа санааларын тиэртилэр.