Чурапчыга сүппүт дьахтары 99 киһи көрдүүр

Чурапчы улууһугар 75 саастаах Анастасия Монастыреваны көрдүүр үлэ салҕанар. Бу туһунан СӨ Быыһыыр сулууспата иһитиннэрэр.
Дьахтар от ыйын 18 күнүгэр Сылаҥ сэлиэнньэтиттэн сүппүт, сарсыарда 6:30 чааска дьиэтиттэн тахсыбыт уонна кэлбэтэх. Эрдэ эмиэ дьиэтиттэн бара сылдьыбыт.







Кинини от ыйын 18-28 күннэригэр барыта холбоон 30 киһи — Чурапчытааҕы көрдүүр-быыһыыр этэрээт быыһааччылара уонна үтүө көмөһүттэр көрдөөбүттэр. От ыйын 29 күнүгэр көрдүүр үлэ сөргүтүллүбүт, Дьокуускайтан иккис кылаастаах быыһааччы, көрдөөччү Максим Колесов уонна Тааттатааҕы көрдүүр-быыһыыр этэрээттэн икки быыһааччы кэлбиттэр.
От ыйын 30 күнүгэр сүппүт киһини көрдүү 99 киһи тахсыбыт — 91 үтүө көмөһүт уонна аймахтара, ИДьМ үс үлэһитэ уонна Быыһыыр сулууспа биэс быыһааччыта.
Быыһааччылар үлэни сүрүннүүллэр, тэрийэллэр. Икки пилота суох көтөр аппараат туһаныллар. Сэттэ бөлөҕү сэттэ хайысханан араарбыттар, хас биирдии бөлөх бэйэтин кыбадыраатын иһигэр көрдүүр. Бүгүн эмиэ үлэ салҕанар.
Сообщить об опечатке
Текст, который будет отправлен нашим редакторам: