Чурапчыга сүппүт дьахтары көрдөөһүн сөргүтүлүннэ, Дьокуускайтан уопуттаах көрдөөччү тиийдэ

От ыйын 29 күнүгэр Чурапчы улууһугар 1950 с.т. Анастасия Монастыреваны көрдөөһүн сөргүтүлүннэ. Бу туһунан Саха сиринээҕи Быыһыыр сулууспатын пресс-сулууспата иһитиннэрэр.

Санатитахха, от ыйын 18 күнүгэр 18:30 чааска Чурапчы улууһун биир кэлим диспетчерскэй сулууспатыттан төлөпүөнүнэн иһитиннэрии киирбит: от ыйын 18 күнүгэр Сылаҥ нэһилиэгин Уһун Күөл сэлиэнньэтигэр Тэйэ учаастактан төрүттээх 1950 с.т. дьахтар (75 саастаах) сарсыарда 06:30 чааска дьиэтиттэн тахсыбыт уонна чуолкай ханна баарбыта биллибэт буолбут.

Былырыын эмиэ дьиэтиттэн барбыт түбэлтэтэ тахсыбыт эбит. Киэһэ 20:00 чааска дьахтары көрдүү 5 быыһааччылаах Чурапчытааҕы көрдүүр-быыһыыр этэрээт тахсыбыт, бөлөх салайааччыта Николай Терютин. Көрдөөһүн олохтоох нэһилиэнньэни кытта от ыйын 28 күнүгэр диэри салҕаммыт да, түмүк тахсыбатах.

От ыйын 29 күнүгэр 11:00 чааска көрдөөһүн сөргүтүлүннэ. Көмөҕө Дьокуускай куораттан уопуттаах көрдөөччү, иккис кылаастаах быыһааччы Максим Колесов тиийбит. Чурапчытааҕы көрдүүр-быыһыыр этэрээттэн 5 быыһааччы үлэлии сылдьар.

Бүгүн, от ыйын 30 күнүгэр, үлэ былаана оҥоһулунна. Көрдөөһүн 7 хайысханан алаастарынан ыытыллыаҕа. 70-ча киһилээх волонтердар уонна олохтоохтор, ол иһигэр Тааттатааҕы көрдүүр-быыһыыр этэрээт үс быыһааччыта, кэлиэхтэрэ диэн күүтүллэр. Уопсайа 100-чэ киһи көрдүөҕэ, пилота суох көтөр аппарат туһаныллар. Көрдүүр сирэ-уота киэҥ, суола-ииһэ мөлтөҕүттэн тиэхиньикэ сылдьар кыаҕа суох.