Василий Кононов хаартыскаҕа түһэриитэ
Норуот дьокутааттара бу күннэргэ өрөспүүбүлүкэҕэ тыа хаһаайыстыбатынан утумнаахтык дьарыктанар киин улуустарга сылдьаллар.
Олох-дьаһах хаамыытын миэстэтигэр сылдьан көрөн-истэн, тыа хаһаайыстыбатын салаатын салайааччыларын, үлэ дьонун кытта көрсөн тыа хаһаайыстыбатын сорох боломуочуйалара улуустарга бэриллибитинэн киириэхтээх мэхэниисимнэр тустарынан саҥа сокуон олоххо киириитин, инники соруктары дьүүллэһэр сыаллаах-соруктаах үлэлииллэр.
Кинилэр Амма улууһугар үлэлээн баран оптуорунньук күн киэһээ Чурапчы улууһугар тиийэн «Мындаҕаайы» тыа хаһаайыстыбатын оҥорон таһаарар кэпэрэтиибигэр сырыттылар диэн Ил Түмэн пресс-сулууспата иһитиннэрэр.
Кэпэрэтиип хороҕор муостааҕы иитиинэн, туораахтаах култуураны үүннэриинэн дьарыктанар. Кинилэр эт-үүт бородууксуйатын оҥорон таһаарыынан уонна ыһыынан 1998 сылтан үлэлэрин саҕалаабыттар.
Күн бүгүн «Мындаҕаайы» кэпэрэтиибигэр 300-тэн тахса төбө ынах-сүөһүнү иитэллэр. Былырыын 364 кэриҥэ туонна үүтү соҕотуопкалаабыттар. Быйылгы дьылга сүөһү эбии аһылыгын 222 гектар иэннээх сиргэ ыһаллар, 1100 туонна сиилэһи бэлэмнээбиттэр. Кинилэр өссө 2015 сыллаахха 200 төбө төрүүр-ууһуур сүөһү турар механизированнай комплексын арыйбыттар уонна үлэни-хамнаһы былааннаахтык ыытан тыа хаһаайыстыбатын бородууксуйатын онорон таһаарыыга оройуон, өрөспүүбүлүкэ биир тутаах тэрилтэтэ буолар.
Хаһаайыстыба салайааччыта Прокопий Старостин билиҥҥи тэтими ыһыктыбакка үлэни-хамнаһы күүһүрдэр соругу туруорарын кэпсээтэ. Ол иһигэр материальнай-техническэй баасаны сөргүтэр былааннаахтарын билиһиннэрдэ.
Ол кэнниттэн дьокутааттар оҕуруот аһын уонна хортуопуйу үүннэриинэн дьарыктанар урбаанньыт Данил Павлов хаһаайыстыбатын көрдүлэр. Тэрилтэ 2016 сыллаахха «Начинающий фермер» диэн граны ылан үлэтин-хамнаһын балачча кэҥэппит.
Былырыын хортуопуйу кинилэр 31 га сиргэ олордон валовай хомуур 25 туонна буолбут. Сиргэ үүннэриллэр оҕуруот аһын 2,6 га иэҥҥэ ыһаллар. Оҥорон таһаарар баасаларыгар 500 туонна хортуопуйу харайар ыскылааттаахтар. Хаһаайын эбии 2 үлэ миэстэтин арыйбыт. Хомуур кэмигэр дуогабарынан дьону эбии наймылаһан үлэлэтэр. Данил Данилович тыа сиригэр саамай туттуллар МТЗ-82 тыраахтары субсидиялаах техникалар кэрискэлэригэр киллэрэллэрэ буоллар диэн дьокутааттарга баҕа санаатын тиэртэ.
Мантан салгыы норуот дьокутааттара Чурапчы улууһун дьаһалтатын дьиэтигэр тыа хаһаайыстыбатын салаатын салайааччыларын, исписэлиистэрин, бааһынай уонна тус хаһаайыстыбалаах дьону кытта көрсүһүүлэрэ буолла.
Төгүрүк остуолга тыа хаһаайыстыбатынан дьарыктанар бааһынай, тэриллиилээх хаһаайыстыбалар салайааччылара ыччаты тыа сиригэр олохтуур сорук күүскэ турбутун уонна бу сорук судаарыстыба бэлиитикэтин быһыытынан улахан таһымҥа тахсан ырытыллан үлэ-хамнас салгыы сүрүннэнэрэ олох туруорбут ирдэбилэ буолла диэн эттилэр.
Холобур, «Земский аграрий» бырагыраама баар буоларыгар баҕа санаалаахтарын мустубут дьон биллэрдилэр. Кинилэр тыа хаһаайыстыбатыгар олохторун тухары хотон уустук үлэтин билбит, ыарахан үлэҕэ эриллибит хотон үлэһиттэрэ, чуолаан ыанньыксыттар эрдэ биэнсийэҕэ тахсалларын сокуонунан мэктиэлиир наадатын туруорустулар. Нэһилиэктэргэ бэтэринээр суоҕа, сэлээркэ сыаната ыарахана тыа сиригэр сытыы кыһалҕа буоларын дьон бэлиэтээтилэр.
Маны таһынан, уоҕурдууга сиэмэ көрүллүүтүн, мелиорация үлэтин ыытыыга саҥа техника атыылаһарга субсидия көрүллэрэ наадатын, чааһынайдартан үүтү тутуу боппуруоһун уо.д.а. кыһалҕалары олохтоохтор туруорустулар. Ил Түмэн салайааччыларын уонна дьокутааттарын кытта маннык атах тэпсэн олорон аһаҕас кэпсэтии, көрсүһүү элбэхтик буоларыгар санааларын тиэртилэр уонна сокуону оҥорор дьон үлэни-хамнаһы иһиттэн көрө-истэ сылдьаллара кэрэхсэбиллээҕин ыйдылар.
Ил Түмэн дьокутаата Дмитрий Поисеев оробуочай бөлөх бу иннинэ Мындаҕаайыга уонна Одьулууҥҥа тыа хаһаайыстыбатынан дьарыктанар хаһаайыстыбаларга сылдьан үлэ дьонун кытта көрсөн кэпсэппиттэрин сырдатта. Кини маннык көрсүһүүлэр уонна тыа сирин дьонун кытта аһаҕас кэпсэтиилэр былаас уонна норуот ситимин бөҕөргөтөллөрүн ааһан, инники өттүгэр бу кыһалҕалары туоратарга үлэни-хамнаһы туһаайаллар уонна сокуоннар олоххо-дьаһахха чопчу дьайыыларын ырытыыга, анаарыыга олук уураллар диэн эттэ.
Саха суругунан литэрэтиирэтэ төрүттэммитэ 125, Аҕа дойду уоттаах сэриитигэр Улуу Кыайыы 80 сылларыгар аналлаах Ийэ…
"Кыайыы Знамятын» эстэпиэтэтэ тиһиктээхтик салҕанар. Бүгүн, олунньу 13 күнүгэр, Бүлүү улууһа Кыайыы Знамятын тутта. Бу…
Ил Түмэн спикерэ Алексей Еремеев салайааччылаах норуот дьокутааттарын оробуочай бөлөҕө бу күннэргэ Амма, Чурапчы улуустарыгар…
Бу күннэргэ Москваҕа «Служение» муниципальнай бириэмийэтигэр 2024-2025 сс. сайаапкалары ылыы түмүгүн таһаардылар. II Муниципальнай бириэмийэҕэ…
Байыаннай дьайыы саҕаламмыта үһүс сылыгар барда. Ол тухары Саха сирин амарах санаалаах, үтүө дууһалаах дьоно…
Бит-билгэ туһунан төһө билэҕин? Киэһэ хойут дьиэҕит муостатын сууйар буоллаххытына, этэҥҥэ сылдьыыгытын, үтүө туруккутун сууйаҕыт.…