Хаартысканы "Сулусчаан" уһуйаан кэлэктиибэ тиксэрдэ.
Бэҕэһээ, муус устар 13 күнүгэр, Чурапчы улууһун Сылаҥ нэһилиэгэр уһуйаан оҕолорун икки ардыгар «Дьулус» диэн хайыһарга күрэхтэһии ыытылынна. Күрэхтэһиини өрөспүүбүлүкэҕэ физкултуурунай хамсааһын саҕаламмыта 100 сылынан уонна «Чэгиэн буол» диэн Бүтүн Арассыыйатааҕы аахсыйа чэрчитинэн «Сулусчаан» уһуйаан тэрийдэ.
Тэрээһиҥҥэ Чурапчы улууһун нэһилиэктэрин уһуйааннара көхтөөхтүк кыттыннылар. Күрэхтэһии икки түһүмэҕинэн буолла — биирдиилээн уонна дьиэ кэргэнинэн сүүрүүлэр.
Кыргыттарга финишкэ 44 сөкүүндэнэн кэлэн бастакы миэстэни Арыылаах уһуйааныттан Мелисса Барашкова, иккис миэстэни Сылаҥтан Долгуна Пудова, үһүс миэстэни Улахан-Күөлтэн Милана Трофимова ылллылар. Ону таһынан «Кыайыыга дьулуурун иһин» диэн анал ааттар Кытаанахтан Сардаана Потаповаҕа, Арыылаахтан Света Терентьеваҕа, Сылаҥтан Намыына-Куо Протодьяконоваҕа туттарылыннылар. Уолаттарга финишкэ 51 сөкүүндэнэн кэлэн бастакы миэстэни Сылаҥтан Арсен Нестерев, иккис миэстэни Сылаҥтан Коля Дьячковскай, үһүс миэстэни Сылаҥтан Тускул Тарасов ыллылар.»Кыайыыга дьулуурун иһин» анал ааттары Чыаппараттан Петя Попов уонна Түмэн Тоскин ыллылар.
Салгыы иккис түһүмэххэ түмүктүүр биэтэккэ 3 мүн. 25 сөк. бириэмэнэн кэлбит Кытаанахтан Потаповтар дьиэ кэргэн бастакы миэстэни, Арыылаахтан Барашковтар дьиэ кэргэн иккис миэстэни уонна Сылаҥтан Дьячковскайдар дьиэ кэргэн үһүс миэстэни ыллылар. «Кыайыыга дьулуур иһин» анал аат Сылаҥтан Протодьяконовтар дьиэ кэргэнигэр иҥэрилиннэ.
Кытаанах нэһилиэгин баһылыга Егор Потапов Хайыһар федерациятын аатыттан күрэһи өрө көтөҕүллүүлээхтик ыытта. Хас биирдии түһүмэх күүрүүлээхтик ааста — төрөппүттэр, иитээччилэр, көрөөччүлэр, ыалдьааччылар бары долгуйдулар. Бэл, сорох кыттааччыларга ыалдьааччылара халыҥ хамаанда буолан бииргэ айаннаан кэлбиттэрэ үөртэ, соһутта.
Улууска уһуйаан саастаах оҕолорго бу күрэс олус сөптөөхтүк ыытылынна диэн кэлбит ыалдьыттар, кыттааччылар, төрөппүттэр бэлиэтээтилэр. Билиҥҥи оҕоҕо эт-хаан сайдара, бөҕөргүүрэ олус наадалааҕын эттилэр. Ону төрөппүттэр өйдүүллэрэ-өйүүллэрэ тэрийээччилэри олус үөрдэр.
«Сулусчаан» уһуйаан кэлэктиибэ тэрээһиҥҥэ күүс-көмө буолбут Сылаҥ нэһилиэгин быһылыгар Егор Макаровка, Сылаҥнааҕы МПЧ үлэһиттэригэр, Чурапчы улууһун успуорт управлениетын начаалынньыгар Дьулус Егоровка барҕа махталын биллэрэр.
Н.А. Макарова, «Сулусчаан» уһуйаан методиһа,
Чурапчы улууһа, Сылаҥ нэһилиэгэ.
Ханнык баҕарар норуокка инники сайдыыны быһаарар күүһүнэн дойдуларын туһугар күүскэ, бэриниилээхтик үлэлии сылдьар, сайдыы суолун…
Үөрэх үгүс кыһаларыгар оҕолор икки ардыларыгар араас сыһыан баар буолар. Доҕордоһуу, кэпсэтии, тэрээһиннэргэ кыттыы, ону…
Аныгы үйэҕэ күннээҕи олохпутугар туох буортулааҕын, киһи этигэр-сиинигэр хайдах дьайарын биллэхпитинэ, быһаарыстахпытына эрэ, бэйэбит уонна…
Оҕону көрөргө уоппусканы ийэ эрэ ылыахтаах диэн буолбатах. Сокуон быһыытынан аҕа, эбээ, эһээ, атын аймахтар…
Бүгүн кэпсэтэр киһим, Угледар хайысхатынан сылдьыбыт, Бүлүү улууһуттан төрүттээх «Дуолан» диэн позывнойдаах штурмовик Борис Иванов…
Дьокуускайга Бүлүүттэн 16 саастаах оҕону санрейсинэн аҕаллылар. Кини балаҕан ыйын 11 күнүгэр суол саахалыгар эчэйбит…