Чурапчыга «Үрүҥ көмүс сынньалаҥ» лааҕыр үлэлээтэ

Быйыл иккис сылын саастаах дьоҥҥо туһуламмыт “Көхтөөх уһун үйэлэнии” социальнай бырагыраама чэрчитинэн СӨ Үлэ уонна социальнай сайдыы министиэристибэтин иһинэн үлэлиир «Победа» социальнай харысхал Ресурснай киинэ “Үрүҥ көмүс сынньалаҥ” сайыҥҥы лааҕыры тэрийэн үлэлэттэ.

Былырыын бу киини кытта улуус дьаһалтата бииргэ үлэлээн, Намнааҕы педкэллиэс баазатыгар 65-80 саастарыгар диэри саастаах дьоҥҥо лааҕыры аан бастакынан үлэлэтиитэ  элбэх киһи сэҥээриитин ылбыта. Быйыл эмиэ өрөспүүбүлүкэ 19 улууһуттан элбэх  киһи кэлэн, Чурапчытааҕы физкултуура уонна успуорт судаарыстыбаннай үнүстүүтүн уопсайыгар олорон сынньаннылар.

Аҕа саастаах дьон лааҕырын тэрийии — «Победа» социальнай харысхал Ресурснай киинин исписэлииһэ Наталья Васильева ааптарскай бырайыага. Кини бу лааҕыры СӨ Бэтэрээннэрин ассоциациятын иһинэн тэрийэн үлэлэтэр. Кэрэхсэбиллээҕэ баар, былырыыҥҥыттан ыла лааҕырга социальнай волонтер быһыытынан «Тыгын Дархан» эрэстэрээни өр сылларга салайбыт СӨ норуотун хаһаайыстыбатын үтүөлээх үлэһитэ, Нам улууһун Бочуоттаах олохтооҕо Мария Габышева — аһы-үөлү, СӨ народнай артыыһа, РФ уонна СӨ үтүөлээх артыыһа, Таатта улууһун Бочуоттаах гражданина Афанасий Афанасьев —  култуурунай сынньалаҥы тэрийиигэ сүбэ-ама буолаллар.

“Үрүҥ көмүс сынньалаҥ” лааҕырга сэттэ күн устата өрөспүүбүлүкэ бэтэрээннэрэ доруобуйаларын бөҕөргөтүнэн, сынньалаҥнарын туһалаахтык атаардылар. Күн аайы араас ис хоһоонноох тэрээһиннэри, куруһуоктары тэҥэ, иһирэх көрсүһүүлэр буоллулар. Ол курдук, «Айылгы» култуура киинигэр Е.А. Борисов аатынан бибилэтиэкэҕэ өрөспүүблүкэтээҕи Дьахталлар сойуустарын иһинэн үлэлиир Уһуйааччылар (наставник) сэбиэттэрин чилиэннэрэ Анстасия Божедонованы уонна Мария Габышеваны кытта улуус дьахталларын сэбиэтин актыыбын кытта көрүстүлэр. Көрсүһүүгэ Чурапчы улууһун нэһилиэктиэригэр Уһуйааччылар сэбиэттэрин тэрийии туһунан кэпсэттилэр.

Маны таһынан, лааҕыр  олоҕор успуорт көрүҥнэригэр күрэхтэһиилэр, айан-тутан таһаарар маастар-кылаастар буоллулар, Таатта улууһун Чөркөөх мусуойун көрдүлэр.

Лааҕыр үөрүүлээх сабыллыытыгар СӨ Үлэ уонна социальнай сайдыы миниистирин солбуйааччы Афанасий Постников, Чурапчы улууһун баһылыгын социальнай боппуруостарга солбуйааччы Мария Кронникова, Чурапчытааҕы судаарыстыбаннай физическэй култуура уонна успуорт үнүстүүтүн ректора Иннокентий Готовцев, “Победа” өрөспүүбүлүкэтээҕи ресурснай Киин салайааччыта Галина Лебедева кыттыыны ыллылар.

Кинилэр хас биирдии көрүҥ кыайыылаахтарыгар өйдөбүнньүк бэлэхтэри туттаран, араас улуустан кэлэн сынньаммыт дьон санааларын көнньүөртүлэр.

Лааҕырга сынньаммыт дьон “сыл аайы иккис сылын саастаах дьоҥҥо анаан “Көхтөөх уһун үйэлэнии” социальнай бырагыраама чэрчитинэн тэриллибит маннык сайыҥҥы лааҕыры улуустан улууска аһан, үлэ бэтэрээннэрин олохторун киэргэтэллэрэ буоллар” диэн баҕа санаалаах тарҕастылар.