Чурапчылар байыастар сырдык ааттарын кэриэстээн сибэкки дьөрбөтүн уурдулар

Бүгүн Байыаннай дьайыы бэтэрээннэрин күнэ. Саха сирин улуустарыгар бу бэлиэ күнүнэн араас сылларга байыаннай дьайыыларга, конфликтарга кыттыбыт бэтэрээннэри чиэстииллэр, кыргыһыы хонуутугар охтубут байыастар сырдык ааттарын кэриэстээн сибэкки дьөрбөтүн уурдулар.

2021 сыл ахсынньы 9 күнүгэр Ил Дархан Айсен Николаев Ыйааҕынан өрөспүүбүлүкэҕэ от ыйын 1 күнүгэр – Байыаннай дьайыы бэтэрээннэрин күнэ олохтоммута. Бу бэлиэ күн 1945 сыл кэнниттэн ССРС, Арассыыйа Федерациятын уонна да атын судаарыстыбалар территорияларыгар бойобуой дьайыыларга, локальнай сэриилэргэ уонна Сэбилэниилээх киирсиилэргэ кыттыбыт Саха сирин олохтоохторун үтүө өҥөлөрүн билинэр сыалтан олохтоммута.

Бүгүҥҥү бэлиэ күҥҥэ Чурапчы улууһун олохтоохторо байыаннай дьайыыларга кыттыбыт биир дойдулаахтарын кытта түмсэн, дойду көмүскэлигэр сырдык тыыннарын толук уурбут хорсун буойуттарын ахтан-санаан, кинилэргэ сүгүрүйэн аастылар.

Артиллерист Г.Д. Протодьяконов аатынан түөскэ анньыллар бэлиэни Александр Матвеевка, Алексей Поповка, Бойобуой ассоциация аатыттан “Аҕа дойдуну көмүскээччи ийэтэ” мэтээли Евдокия Матвееваҕа туттардылар диэн Чурачы улуһуун дьаһалтата иһитиннэрэр.

«Бу күн билиҥҥи буола турар байыаннай дьайыы түргэнник түмүктэнэн, эйэлээх олох кэлэригэр баҕара хааллыбыт. Санатан эттэххэ, Саха сиригэр 3,5 тыһ. байыаннай дьайыы уонна локальнай сэрии кыттыылаахтара, улууспутугар 40-тан тахса бойобуой дьайыы бэтэрээннэрэ бааллар. Кинилэр улууспут уопсастыбаннай олоҕор көхтөөхтүк кытталлар, дойдубут сайдарын туһугар күннэтэ кылааттарын киллэрсэллэр», — диэн улуус баһылыга Степан Саргыдаев санаатын үллэстэр.