Чурапчылар – бары күүһү окко!

Быйыл сайын ардахтаах буолан, оттооһун хаамыыта бытаарбыта.  Соторутааҕыта Ил Дархан Айсен Николаев туруоруллубут соругу ситиһэргэ бары күүһү түмэргэ, хас биирдии үтүө күнү туһанар уонна бары кыаҕынан үлэлиир соругу туруорбута.

Чурапчы улууһун салалтата оттооһун хаамыытын билсэр сыаллаах нэһилиэктэринэн сырыыта бу үүммүт нэдиэлэҕэ салҕанар. Ол курдук, Чакыр, Хайахсыт, Хадаар эргин, Арыылаах, Кытаанах хайысханан үлэни-хамнаһы көрөр-истэр, баар кыһалҕалары туоратыыга быһаарыылары ылынар сыаллаах үлэ барыа диэн улуус баһылыга Степан Саргыдаев иһитиннэрэр.

Быйыл Чурапчы улууһугар от үүнэригэр усулуобуйа баар курдук эрээри, сорох сиргэ, сааскы өттүгэр хаһыҥнаан, от аанньа үүммэтэх. Ходуһа сорҕото ууга сытарынан, сотору-сотору ардахтаан, оттуур сиргэ тиийэр суол мөлтөҕө күчүмэҕэйдэри үөскэппит. Онон улуус баһылыга мобильнай биригээдэлэри тэрийэн, олох хойукка диэри оттуур сөбүн бэлиэтээтэ.