Чурапчылар «Манчаары оонньууларыгар» бастаабыт күрэсчиттэригэр убаһа уонна харчы бэлэхтээтилэр

Чурапчы улууһун дьаһалтата «Манчаары оонньууларыгар» ситиһиилээхтик кыттыбыт күрэсчиттэри эҕэрдэлээтэ. Спартакиадаттан улуус күрэсчиттэрэ 16 кыһыл көмүс, 19 үрүҥ көмүс, 19 боруонса мэтээллэри аҕалбыттар. Онон уопсай түмүккэ бэйэлэрин бөлөхтөрүгэр бастакы миэстэ буолары ситиспиттэрэ.

“Манчаары оонньууларыгар” чурапчыларга улахан үөрүүнү, кыайыыны аҕалбыт күрэсчиттэрбитин үөрэн-көтөн туран чиэстээтибит. Кинилэргэ уонна тириэньэрдэригэр махтанан уонна киэн туттан туран, харчынан сэртипикээттэри кытары улуус наҕараадаларын туттардыбыт. Успуорт туонатыгар өссө да ситиһиилэр кэлэ турдуннар!» — диэн улуус баһылыга Степан Саргыдаев телеграм-ханаалыгар суруйар.

Улуустааҕы «Саҥа олох» хаһыат суруйарынан, кыһыл көмүс мэтээллээхтэргэ убаһа уонна 30 тыһ. солк. сэртипикээттэр, үрүҥ көмүс мэтээллээхтэргэ 70 тыһ. солк сэртипикээттэр, боруонса мэтээллээхтэргэ 50 тыһ.солк сэртипикээттэр туттарыллыбыттар.