Чурапчылар Нерюнгрига сылгы үөрүн тиэйэн аҕаллылар

Нерюнгрига быйыл 18-с сылын ыытыллар Олоҥхо ыһыаҕар Чурапчыттан 120-н тахса киһилээх улахан дэлэгээссийэ кыттыыны ыла сылдьар.

Дэлэгээссийэни салайан кэлбит Чурапчытааҕы культура салаатын иһинэн үлэлиир Олоҥхо киинин салайааччыта Дмитрий Попов маннык сырдатта:

— Нерюнгри тэриллиэҕиттэн Чурапчы улууһа бырааттыы-доҕордуу сыһыаны олохтоон, үтүө үгэһи дьоһуннаахтык өрө тутан кэллэ.
Онон бу Олоҥхо ыһыаҕын тэрээһинигэр улууспут баһылыга Степан Саргыдаев ураты болҕомтону ууран, чурапчылар улахан үлэни ыыттыбыт. Ол курдук, саха бастакы романиһа, олоҥхоһут суруйааччы С.С. Яковлев-Эрилик Эристиин дойдутуттан Чакыр нэһилиэгиттэн сиэри-туому толорууга бүтүн атыыр үөрэ кэлэн, Нерюнгри сиригэр үктэннэ.Түһүлгэ киэргэлэ буолар чэчир кэһиибит эмиэ кэллэ. Олоҥхо ыһыаҕын ыраастыыр аналлаах унаар түптэҕэ анаммыт кии тиэллэн кэллэ. Маны таһынан, «Кымыс үрдүн охторор» сиэргэ-туомҥа туттуллар сахалыы иһит-хомуос аҕаллыбыт. Биир сүрүн тэрээһиннээх көмөбүт Уустар түһүлгэлэрин аһыллыытын сиэрин- туомун оҥорууга ананна. Манна Чурапчытааҕы П.М. Решетников аатынан норуот тыйаатырын режиссера, СӨ култууратын үтүөлээх үлэһитэ Иван Бушков айар бөлөҕө кэлэн үлэлии сылдьар.
Маны таһынан, бары ыытыллар тэрээһиннэргэ, куонкурустарга төһө кыалларынан кыттыахпыт диэн баҕалаахпыт. Нөрүөн-нөргүй, уруйданнын бырааттыы сыһыаннаах куораппытыгар ыытыллар Олоҥхо ыһыаҕа!

Ити курдук, Нерюнгри бырааттыы оройуонугар Чурапчы улууһа тугунан да кэмнэммэт өйөбүлү оҥорон, быйылгы Олоҥхо ыһыаҕын уос номоҕо буолар холобурун көрдөрдө.

Хаартыска: Дмитрий Попов тиксэриитэ