Чурапчылар оскуоланы мэтээлинэн бүтэрбит выпускниктарын чиэстээтилэр

Бүгүн Чурапчы улууһугар оскуоланы кыһыл уонна үрүҥ көмүс мэтээлинэн бүтэрбит 17 выпускнигы чиэстээтилэр.

Кыһыл көмүс мэтээлинэн С.К. Макаров аатынан Чурапчытааҕы гимназияттан Инга Григорьева, Дина Максимова, Инна Пермякова, Сандаара Саввина уонна Алаҕартан Иван Слепцов бүтэрдилэр диэн Чурапчы улууһун дьаһалтата иһитиннэрэр.

Үрүҥ көмүс мэтээл хаһаайыннарынан С.К. Макаров аатынан Чурапчытааҕы гимназияттан Карина Баина, Анна Захарова, Лилия Ноговицына, Николай Павлов, Дайаана Рожина, Юлиана Саввина, Арина Сотникова, С.А. Новгородов аатынан Чурапчы орто оскуолатыттан Семен Егоров, Хатылыттан Валентина Иванова, Чакыртан Айсена Михайлова, Сылаҥтан Айна Яковлева буоллулар.

«Оҕолору, төрөппүттэри бу улахан ситиһиигитинэн истиҥник эҕэрдэлиибин! Оҕолор үрдүк үөрэххэ киирэн, идэни баһылаан, төрөөбүт дойдулара сайдарын туһугар үлэлиир-хамсыыр дьоһун дьон буолуохтара диэн эрэнэбин», — диэн Чурапчы улууһун баһылыга Степан Саргыдаев бастыҥ үөрэнээччилэргэ уонна төрөппүттэргэ эттэ.