Чыаппара. Уот уонна үүт кыһалҕалара

Чурапчы улууһугар Чыаппараҕа Бырабыыталыстыба отчуотун мунньаҕа бүгүн, олунньу 12 күнүгэр, А. П. Лыткина аатынан култуура киинигэр буолла.

Отчуот кэнниттэн кэккэ ыйытыылар киирдилэр. Бастакынан олохтоох баһаарынай чаас салайааччыта Илья Гоголев тыл эттэ. Туруорсуута — нэһилиэккэ сэртипикээттээх электрик ананан кэлиитэ. Уот оҥорооччу суоҕа элбэх кыһалҕаны үөскэтэр, ол иһигэр баһаар умуруорууга боротокуол быһыытынан элэктэриичэстибэ уотун идэлээх исписэлиис араарыахтаах диэн этэр.

Кини кэнниттэн микрофону көрдөөбүт Таисия Герасимова эмиэ уот кыһалҕатын көтөхтө. Кини олорор түөлбэтэ Уус Алдан улууһун ситимигэр холбонон турар эбит. Онон арахсыы буоллаҕына төттөрү холбоноро олус өр буолар диир. Ону кытта Таисия Васильевна 2025 сылга киин хочуолунай кыаҕа улаатарыттан улаханнык үөрэрин эттэ: «Дьэ, быйыл кыстык мас кэрдэн баран, аны, тохтуур инибит диэн астына саныыбын. Онтон киин сылааска холбонон абыраныахпыт этэ!».

Уот туһунан ыйытыыга «Якутскэнерго» испэсэлииһэ Дмитрий Шувалов хоруйдаата. Кини этэринэн, исписэлиис аныырга сайаапка киирбит, билигин сөбүлэһэр киһи көрдүү сылдьаллар. «Дьиэнэн хааччыйыахпыт диэн этиллибитэ эрээри, өссө даҕаны баҕалаах үлэһит көстө илик», — диир кини. Ситими көһөрүү туһунан «2025 сылга диэри реконструкция  түмүктэниэхтээх. Ол иһинэн маннааҕы ситим 10 киловольт кыамтаҕа көһөрүллүө, онно тута эһигини Чурапчы улууһун ситимигэр холбуохпут» диэн эппитин мустубут дьон ытыс тыаһынан көрүстэ.

Үгүс ыйытыылар сүөһү иитиитин, үүт туттарыытын, сыанатын туһунан буоллулар. Биир кыһалҕаны: «Тоҕо үүт анаалыһын сыаната улуус-улуус аайы уларыйа сылдьарый? Мин билэрбинэн биһиги саамай үрдүк сыананы төлүү олоробут» диэн олохтоох фермердэр бэрэстэбиитэллэрэ туоһуласта. Улуус баһылыга Степан Саргыдаев бу боппуруоһунан дьарыктана сылдьарын иһитиннэрдэ уонна бу ыйытыыны мунньах боротокуолугар киллэрэн тустаах министиэристибэҕэ тиэрдэргэ эттэ.

Бырабыыталыстыба отчуотун истэ кэлбит дьон ааспыт сыллааҕы үлэ түмүктэрин сөптөөҕүнэн сыаналаатылар. Дьон улуус сүрүн суола тупсубутун, түргэн интэриниэттээх суотабай сибээс кэлбитин бэлиэтээн эттилэр.