Хаартыска: ааптар тиксэриитэ
Харбалаахтааҕы үөрэхтээһин холбоһугар Улуу Кыайыы 80 сылыгар аналлаах «Бастыҥнар хамсааһыннарын» ыытар аахсыйатын чэрчитинэн «Чымадаан иһигэр түмэл» тэрээһин буолла.
Тэрээһиҥҥэ Чымнаайыттан Парасковья Кузьминична Богдокумова, Иван Степанович Могдоев, Харбалаахтан кэллиэксийэньиэрдэр түмсүүлэрин көхтөөх кыттааччылара, салайааччылара Изабелла Викторовна Харлампьева, Светлана Васильевна Башарина, Августина Дмитриевна Ючюгяева, Василиса Ивановна Дьяконова кэлэн кытыннылар. Тэрээһин үөрүүлээх чааһыгар «Харбалаах уоланнара» кыра бөлөх уолаттара Тимофей Сметанин «Саллаат» хоһоонун иэйиилээхтик аахтылар. Дириэктэр Любовь Аркадиевна Афанасьева ыалдьыттары кэлэн иһэр Кыайыы күнүнэн эҕэрдэлээн туран, ыччаты төрөөбүт дойдуга бэриниилээх буоларга иитэр үлэҕэ күүс-көмө буолалларын иһин махтанна уонна Махтал суруктары, тыыннаах сибэкки дьөрбөтүн туттартаата.
Онтон үс бөлөххө арахсан, кэрийэ сылдьан, ыалдьыттарбыт кэпсээннэрин иһиттибит, чымадааҥҥа тэрийбит түмэллэрин кэрэхсии көрдүбүт. П.К. Богдокумова Төрүккэ олорон ытык сэриигэ кыттыбыт 5 быраат Дайбанныровтар туһунан кэпсээтэ. И.С. Могдоев биһиги Харбалаахпыт биир уулуссата кини эһэтин аатын сүгэрин туһунан этэн туран, хапытаан Слепцов туһунан олус долгутуулаах ахтыыны оҥордо.
И.В. Харлампьева сэрии кэминээҕи олоҕу сырдатан туран, оччотооҕу таҥастары, куобах суорҕаны көрдөрбүтүн олус сэҥээрдибит. С.В. Башарина төрөппүттэрин сэрии кэминээҕи олохторун, алтыһан ааспыт Харбалаахха олорбут сэрии бэтэрээннэрин туһунан кэпсээнэ эмиэ олус интэриэһинэй. А.Д. Ючюгяева аҕатын учуутала Николай Романович Малышев аҕатыгар суруйбут алгыс тыллаах суруктарын ааҕан иһитиннэрдэ, көрдөрдө. В.И. Дьяконова аҕата Иван Сергеевич Кривошапкин сэрии кыттыылааҕын бойобуой сырыыларын туһунан, кини мэтээллэрин, туттубут малларын, хаартыскаларын чымадаантан хостоон көрдөрө-көрдөрө, кэпсээбитин кэрэхсээн иһиттибит.
Бу үүнэн иһэр көлүөнэ ыччакка олус наадалаах, туһалаах тэрээһин буолла. Ийэ дойдуга бэриниилээх буолуу үтүө холобурдарын истэн, сүрэхпитигэр олус чугастык ылынныбыт.
Тэрээһин ыалдьыттарыгар улаханнык махтанабыт!
Таисия АНДРЕЕВА, Харбалаах
Муус устар саҥатыгар ИДьМ дьуһуурунай чааһыгар Хаҥалас оройуонугар Улахан Ааҥҥа чааһынай дьиэ умайбытын туһунан иһитиннэрии…
“Мин санаам бары салаалара салҕанан барыахтарын баҕарабын...” (“Пусть нити моих мыслей продолжаются...”). Бу П.А.Ойуунускай аатынан…
П.И. Дудин аатынан Дьокуускайдааҕы сибээс уонна информационнай технология кэллиэһин баазатыгар космическай кэтээн көрүү дааннайдарын уонна…
Муус устар 12-18 күннэригэр Дьокуускай куоракка физкултуураҕа Бүтүн Арассыыйатааҕы үөрэнээччилэр олимпиадаларын түмүктүүр түһүмэҕэ буолан ааста.…
Саха сирин ИДьМ холуобунай ирдэбилин управлениетын оперативниктара Булуҥ оройуонугар урут сууттана сылдьыбыт 34 саастаах киһини…
Олоххо араас түгэн баар. Холобур, сорохтор кистии-уора болкуоҥҥа шашлык эмиэ буһарар түгэннэрэ тахсар. Мапнна биир…