Чүүйэ алааска «Ходуһа хоһууттара» илии хотуурунан күүлэй саҕаланна

Бүгүн, атырдьах ыйын 16 күнүгэр, Мэҥэ Хаҥалас улууһун Ходоро нэһилиэгин Чүүйэ алааһыгар «Ходуһа хоһууттара-2025» илии хотуурунан өрөспүүбүлүкэтээҕи аһаҕас күөн күрэһэ аһылынна.

Тэрээһин Улуу Кыайыы 80 сылыгар, Арассыыйаҕа Аҕа дойдуну, Саха сиригэр Ийэ дойдуну көмүскээччилэр, Уһук Илин эрэгийиэн төрүттэмитэ 25 сылыгар, Саха национальнай дьоруойа Баһылай Манчаары төрөөбүтэ 220 сылыгар, Мэҥэ Хаҥалас улууһа төрүттэммитэ 95 сылыгар, улууска тыа хаһаайыстыбатын сылларыгар ананна.

Бүгүҥҥү тэрээһиҥҥэ күүстэрин холоноору кэлбит алта улуустан 47 уһун тыыннаах отчут сэлэлээн хааман киирдилэр.  «Ходуһа хоһууттара» күөн күрэс тыа хаһаайыстыбатын министиэристбэтэ уонна Мэҥэ Хаҥалас улууһун холбоһуктаах тэрээһиннэрэ. Эҕэрдэ уонна кэс тылы эппиттэр бары бу кэскиллээх күрэс ыччаты от үлэтигэр сыһыарыы буоларын бэлиэтээтилэр.

Былырыын уонча араас саастаах оҕо кыттыбыт буоллаҕына, быйыл уопуттаах отчуттар ортолоругар 16 күрэстэһээччи оҕо баар. Онон тэрээһин соругун сыл аайы толорон иһэр диэххэ сөп.

Бу чааска отуттар Чүүйэ алааһыгар «Ходуһа хоһууттара» күрэскэ кыттан, от охсо киирдилэр.