Cуоппар уруулга олорон утуйбут, түмүгэр массыына түҥнэстибит

Алтынньы 23 күнүгэр киэһэ 17.10 саҕана Чурапчы улууһун ИДьМ сулууспатын ГАИ отделын дьуһуурунай чааһыгар «Халыма» айан суолун 152 км сиргэ массыына суолтан туораабытын туһунан иһитиннэрии киирбит.

Барыллаан быһаарыынан, алтынньы 23 күнүгэр киэһэ 17.10 чаас саҕана 39 саастаах суоппар «Хонде Фрид» массыынаны ыытан иһэн уруулга утуйбут. Ол түмүгэр тимир көлө суолтан туораабыт уонна түҥнэстибит.

Массыына салонугар суоппартан ураты биэс пассажир, үс улахан киһи уонна икки саастарын ситэ илик оҕолор бааллар эбит. Саахал түмүгэр 29 саастаах пассажир эчэйии ылбыт, киниэхэ амбулаторнай эмтэниини анаатылар.

«Ыытыллыбыт мэдиссиинэ көрүүтүн түмүгүнэн суоппар арыгы испэтэҕэ чуолкайданна. Суол саахалын чахчытынан административнай силиэстийэ тэрилиннэ, бэрэбиэркэ ыытыллар», — диэн ГАИ управлениетын пресс-сулууспата иһитиннэрэр.