Cүбэһит: Бурдуга суох килиэби оҥоробут

• Кыһыл чечевица – 200 г .
• Хойуу йогурт – 100 мл.
• Сымыыт – 2 уст.
• Үүнээйи арыыта (оливковай) – 2 ост.нь.
• Разрыхлитель – 10 г.
• Туус– 0.3 ч.нь.
• Кунжут – 1 ч.нь.

Йогурт оннугар кэпиир, хойуу сүөгэй буолуон сөп. Чечевицаны сууйан баран, үрдүгэр уу кутан, киэһэ ууран кэбиһэбит. Сарсыарда туран, уутун тоҕобут уонна сымнаабыт чечевицаны блендердээн кэбиһэбит. Атын бородуукталарын эбэн, булкуйан, эмиэ блендердээн баран, арыынан сотуллубут анал иһиккэ кутан, үрдүгэр кунжут, тыыкыба, подсолнух сиэмэлэрин табыгынатан, киэргэтиэххэ, тупсарыахха сөп.

Онтон сылыйбыт духуопкаҕа лэппиэскэ курдук буһарабыт. Үчүгэйдик буспутун мас үтэһэнэн дьөлө анньан, билиэххэ сөп. Ортото ситэ буһа илик буоллаҕына, духуопканы 160 кыраадыска диэри мөлтөтөн баран, өссө буһара түһэбит.

Хара килиэп курдук дьүһүннээх, амтаннаах буолар. Өссө сыыры, күөх оттору, эриэхэлэри, о.д.а. эбиэххэ сөп, ол онтон амтана уларыйан биэрэр. Маҥан сыырынан сыбаан баран, күөх петрушканы, туустаах балыгы кытта бутерброд оҥосторго бэртээхэй.

Чечевицаттан килиэп элбэх белоктаах уонна тимирдээх (железо), онон анемиялаах дьоҥҥо туһалаах. Саахара, глютена суох аһы аһыы сатыыр, аллергиялаах, улахан ыйааһыннаах дьоҥҥо сөп түбэһэр.