Cыыппара кыаҕын үөрэххэ туһаныы тула кэпсэттилэр
![](https://sakha-sire.ru/wp-content/uploads/2023/11/1-7.jpg)
Сыыппара эйгэтэ олохпутугар сыыйа киирэн иһэр, күннээҕи үөрэҕи, олоҕу судургутутар. Маныаха саҥа ньымалары олоххо киллэрии үөрэх хаачыстыбатын үрдэтэр, оҕону үөрэҕи сэҥээригэр көмөтө саарбаҕа суох. Сыыппара кыаҕын үөрэххэ хайдах туһанар туһунан бу күннэргэ Дьокуускайга ыытыллар турар “Цифровой алмаз” федеральнай пуорумҥа кэпсэттилэр.
Бүгүҥҥү тэрээһиҥҥэ хас даҕаны спикер кэлбит. Дневник.ру хампаанньа дириэктэрин солбуйааччы Владислав Моисеев иһитиннэрбитинэн, хампаанньа үлэлээбитэ ыраааппыт, билигин судаарыстыбаннай-чааһынай бииргэ үлэлэһиини, үөрэх эйгэтигэр информационнай систиэмэни тэрийэллэр.
“Хампаанньабыт хас даҕаны хайысхатыттан биирдэстэринэн Якласс буолар, саамай улахан баазалаах. Саамай сүрүнэ, федерация таһымыгар учуоттанар, көрдөрүүнү туһаныахха сөп.
Учуутал бэйэтин страницатыгар дьиэҕэ үлэ биэрэр, онтон үөрэнээччи төһөтүн толорбутун барытын көрө олорор. Ону таһынан, оскуола дириэктэрэ, үөрэх министиэристибэтэ, баһылык үөрэх хаачыстыбатын устуоруйатын кэтээн көрөр кыахтаах. Төһө элбэх дьиэҕэ үлэ бэриллибитин, төһөтө онлайн, кэмигэр төһө толорбуттарын, хаачыстыбата хайдаҕын, барытын кэтээн көрөллөр”, — диэн этэр. Түмүгэр хаалыылаах уонна туйгуннук баран иһэр оҕолору анаалыстаан көрөллөр, чопчу үлэлэһэллэр эбит. Маны таһынан, ханнык эрэгийиэҥҥэ оҕо төһө ноҕоруускалааҕын, сылайбытын эмиэ көрөр кыахтаахпыт диир.
“Саха Өрөспүүбүлүкэтин ыраах сытар, учуутала суох улуустарыгар атын эрэгийиэн учууталлара тэйиччиттэн уруоктары ыыталларын курдук сыһыарыахпытын эмиэ сөп”, — диэн салайааччы этэр.
“Биһиги, дьоппуоннарга роботтары атыылаабыт нууччаларбыт” – диэн дьээбэлээн этэллэрин туһунан иһитиннэрэн, “Роббо” хампаанньа экспиэрэ Андрей Кравцов көрөөччүлэр болҕомтолорун тута тарта. “Роббо” — Арассыыйатааҕы хампаанньа, сүрүн офистара Санкт-Петербурга. Финляндияҕа, Кытайга, Японияҕа бэрэстэбиитэлистибэлэрэ бааллар эбит. Аан дойду үрдүнэн 500 үөрэх кылаастаах, 36 дойдуну хабар, 100 тыһ. тахса оҕо кинилэр мэтиэдикэлэринэн үөрэнэр. Эспиэр новатор-инженердэри иитэн таһаарыы туһунан билиһиннэрдэ. “Биһиги туох кыһалҕаны быһаарабыт? Аан дойдуга инженердэр тиийбэт кыһалҕалара сытыытык турар. Маны улахан чинчийиилэр туоһулууллар. Арааһа, маны хайдах быһаарары “Роббо” хампаанньа биллэ. Оҕо саҥаны киллэрээччи инженер буоларыгар робот иһигэр туох баарын билиэхтээх, иһин үрэйэн көрүөхтээх, бэйэтин бырагырааматын киллэриэхтээх. Оччоҕо эрэ кини саҥаны киллэрэр инженер буолар кыахтаах. Бу аһаҕас технологияҕа эрэ кыаллар” – диэн этэр. Итиэннэ эрдэҕэс оҕотооҕор, оҕону кыратыттан сыһыарар, сэҥээрдэр, умсугутар судургу диэн бэлиэтиир. Кинилэр оҕолору кытта 5 саастарыттан үлэлэһэллэр эбит. Дьарык быыһыгар үөрэххэ киирэргэ 100 баалга тиийэ биэрэр тиэхэньиичэскэй олимпиадаларга кытыннараллар. “Приведи ребенка — забери инженера” диэн тумус туттар этиилээхтэр эбит. Маҥнай оҕо оонньуур, онтон үөрэнэр, салгыы бэйэтэ оҥорор, биисинэс тэринэр, үүнэр-сайдар…
Пуорум кэмигэр баҕалаах дьон бастакы этээскэ тустаах платформаны кытта билсэр, көрөр-истэр кыахтарын эмиэ тэрийбиттэр. Уопсайынан, пуорум сыыппара эйгэтин сэҥээрэр, бу салааҕа үлэлэһэр дьоҥҥо улахан кыаҕы тэрийбит. Ордук эдэр дьоҥҥо туһалаах буолсу.
Ити курдук, дойду үөрэҕи сыыппараҕа киллэриинэн дьарыктанар, үөрэххэ сыһыаннаах өҥөлөрү оҥорор хампаанньалара кэлэн үлэлэрин хайысхатын сырдаттылар. Сэҥээрбит тэрилтэлэр, эрэгийиэннэр салгыы бииргэ үлэлэһиигэ сөбүлэҥ түһэрсиэхтэрэ.
![](https://sakha-sire.ru/wp-content/uploads/2023/11/1-7.jpg)
![](https://sakha-sire.ru/wp-content/uploads/2023/11/2-6.jpg)
![](https://sakha-sire.ru/wp-content/uploads/2023/11/5-2.jpg)
![](https://sakha-sire.ru/wp-content/uploads/2023/11/6-5.jpg)
Сообщить об опечатке
Текст, который будет отправлен нашим редакторам: