«Цифровой алмаас» үһүс пуорум үлэтэ саҕаланна

Бүгүн Дьокуускайга “Цифровой алмаас” үһүс федеральнай пуорум үлэтин саҕалаата. Тэрээһин сүрүн тиэмэтинэн дойду сайдыытын сүрүннүүр эрэгийиэннэр цифровой трансформациялара буолар.

Тэрээһин бастакы күнэ «Цифровой алмаас» федеральнай пуорум аһыллыытынан саҕаланна. Ил Дархан Айсен Николаев эҕэрдэ тыл этэригэр СӨ Бастакы Бэрэсидьиэнэ Михаил Николаев төрөөбүт күнүн, сэтинньи 13 күнүн, Инновация күнүнэн биллэрбитин иһитиннэрдэ.

Айсен Николаев олус элбэх ыалдьыт биһиги эрэгийиэммитигэр уопут атастаһа кэлбитин бэлиэтээтэ. «Төһөнөн ситиһиилэрбитин, үөрүйэхпитин хардарыта атастаһабыт, соччонон дойдубут кыаҕыран, өрөспүүбүлүкэбит цифровой сайдыыта кэҥээн иһиэҕэ«,- диэтэ кини.
Тэрээһин биир бэлиэ түгэнинэн Арассыыйа Дьоруойа, космонавт Олег Артемьев космоска тиийэ сылдьыбыт «Кындыкаан» куукуланы төттөрү дойдутугар аҕалбыта буолла.  «Маннык цифровой пуорумнар ыытыллаллара олус наадалаах. Биһиги космическай станциябыт барыта цифровой. Онон кэскиллээх дьыаланан дьарыктанаҕыт«, — диэтэ космонавт.

Пуорумҥа Карелия Өрөспүүбүлүкэтин дьаһалтатын информатизацияҕа управляющайа Дмитрий Маринов кэлбит. «Саха сирэ инновационнай үлэлэринэн аатырар. Онон уопут атастаһа диэн кэллибит. Пуорумҥа цифровой трансформация, цифровизация хайысхаларынан үлэлиэм, ИТ хампаанньалары кытта билсиэм«,- диэтэ.

Салгыы кэлбит ыалдьыттарга «Цифровой алмаас» быыстапка кыттыылаахтара бэйэлэрин үлэлэрин билиһиннэрдилэр.

Ааптар хаартыскаларга түһэриитэ