“Циркэ оҕолоро” Кытайга үөрэнэ бардылар

Былырыын Хэбэй акробатическай (цирковой) ускуустуба оскуолата Саха сириттэн 20 оҕону ылан үөрэтэргэ сөбүлэҥин биэрбитэ. Пекиннээҕи “Оулу” үөрэтэр киин салайааччыта Ван Хе кэлэн, норуоттар икки ардыларынааҕы кылаастаах циркэ артыыстарын бэлэмнээһиҥҥэ тус сыаллаах дуогабарга илии баттаһан барбыта.

Саха циркэтин төрдүс бөлөҕүн оҕолоро алтынньы 16 күнүгэр Кытайга көттүлэр. Төрөппүттэрэ долгуйа, сайыһа, алҕыы хааллылар. Кинилэри учууталлара уонна СӨ үтүөлээх артыыһа, акробаттар бөлөхтөрүн салайааччы, Пекиҥҥэ бастакы бөлөх кыттааччыта Александр Посельскай арыаллаан илтилэр.

Кыракый киһи ийэтиттэн-аҕатыттан арахсан, өр кэмҥэ атын дойдуга барара, мин саныахпар, ыарахан. Ол эрээри, оҕолор долгуйбат курдуктар, эппиэтинэһи өйдүүллэр, саамай сүрүнэ, олус баҕалаахтар, олохторун суолун буларга, ыра санааларын толорорго улахан хардыыны оҥордулар”, — диэн санаатын үллэһиннэ.

Анна Александровна, учуутал:

— Мин 4 сыл оскуолаҕа үлэлээбитим. Оҕолору үөрэтэрбин наһаа сөбүлүүбүн. Ол эрээри, туох эрэ атыны боруобалаан көрүөхпүн баҕарбытым. Ол иһин биллэриини көрөөт да, кэлбитим. Кэпсэтэн баран, тута ылбыттара.

Оҕолорго учуутал эрэ буолбакка, иитээччи, настаабынньык курдук буолабыт. Оскуола сүрүн биридимиэттэрин биһиги сахалыы, нууччалыы үөрэтиэхпит. Ийэни-аҕаны солбуйар курдук буолабыт. Бастаан син биир атын дойдуга үөрэнэргэ ыарахан буолуо, кыратык долгуйабын, ол эрээри барыта үчүгэй буолуо диэн эрэнэбин. Оҕолору кытта үлэлиир уопуттаах буоллахпыт. Усулуобуйатын билсибиппит — сабыс-саҥа оскуола, комплекс, хосторо наһаа үчүгэйдэр этэ. Уопсайга бары биир дьиэ кэргэн курдук олорор буолабыт. Үчүгэй, бэрээдэктээх оҕолор, биир тылы булбуппут.

Витя Ефремов, 10 саастаах:

— Мин кыра эрдэхпиттэн гимнастиканан дьарыктанабын. Имигэспин, бэйэбин кыанабын. Ол иһин циркэ оҕо устуудьуйатыгар киирэн, үс сыл дьарыктаммытым. Улааттахпына, акробат буолуом. Манна доҕотторум бааллар. Ыраах барарбыттан куттаммаппын. Ээ, наһаа ыарахан буолуо суоҕа дии саныыбын. Оскуолаҕа үөрэнэрбэр эмиэ олус эрдэ турааччыбын, онтон киэһэ дьарыкпар барааччыбын. Дьоммун ахтыам эрээри, барытын тулуйуом.