Даайа Амматыгар оскуола-саады, 4G сибээһи, дизельнэй станцияны туруорсаллар

Таатта улууһун Даайа Аммата 220 киһилээх дьоҕус нэһилиэк. Ааспыт үйэ 80-с сыллар саҕаланыыларыгар кырыс сири туһаҕа таһаарыы хамсааһынынан, ыччат-комсомольскай биригээдэлэр тэриллэн, саҥа бөһүөлэк баар буолбута. Бу комсомолецтартан сорохторо билигин да олороллор.

Былырыын күһүн Даайа Амматын килбэйэр киинигэр 3-4-түү этээстээх, 33 кыбартыыралаах 2 таас дьиэ дьэндэһэн турар. Бу 2015 сылтан туруорсан, ‘Хаарбах дьиэттэн көһөрүү» федеральнай бырагыраамаҕа хабыллан, эргэ арболитовай дьиэ олохтоохторо көһөн киирэн, үөрүүлэрэ муҥура суох. Үстүү, иккилии хостоох, толору хааччыллыылаах, киэҥ-куоҥ, сырдык кыбартыыралар. Оҕолуун-уруулуун сүүстэн тахса киһи олорор, онон омуннаабакка эттэххэ, бөһүөлэк аҥаара көһөн киирбит.
Хомсомуоллар »быыпсай» буолбаттар. Ол да курдук, дьоҕус сааланы толору мустан олорон, бары кэриэтэ туран, санааларын, кыһалҕаларын этиннилэр, ыйытыыларын биэрдилэр. Мунньах болдьоҕо бүппүтүн да кэннэ, этиэх баҕалаах баар буолла.

Дьэ, Даайа Амматын олохтоохторо тугу туруорсаллар?
Сүрүннээн нэһилиэк кыһалҕаларын: оскуола-саады уонна спортивнай сааланы тутууну, Дьиэбэгэнэ үрэҕэр муоста тутуутун, »Билайнҥа» аккумуляторы саҥардыыны, хочуолунайга уот бардаҕына, саппаас дизельнэй станцияны, сибээскэ 4G киириитин, мелиорация боппуруостарын сытыытык туруордулар.
Ону тэҥэ, Өлүөнэ муостатын тутууттан саҕалаан, Тааттаҕа гаас кэлиитин, сэрии хаһан бүтэрин туһунан, о.д.а. ыйытыылары биэрдилэр.
Сахайаана Святославовна 5 оҕолоох ыаллар олорор усулуобуйаларын тупсарар бырагыраамаҕа уочарат туһунан уонна төлөбүрү 50% толуйуу туһунан ыйытта.

Тутуу миниистирин солбуйааччы Евгений Петров маннык хоруйдаата:
— Бу уочаракка 1900 тахса ыал турар. Бу уочараты кыччатар сыалтан, быйылгыттан 50%-нын толуйар буоллубут. Манна барыта 750 мөлүйүөн солкуобай көрүллүбүтэ, мантан 250 мөлүйүөнэ бу 50%-наах толуйууга барар. Уочараты кэтэһиэхтэрин баҕарбат дьоҥҥо тута биэрэбит, 3-4 мөлүйүөн солкуобай буолар, маны олорор усулуобуйаны тупсарарга ыытыллыахтаах, анал тэрилтэҕэ туттарыахтаах. Дьиэҕэ салҕааһын тутарга эмиэ көрүллүөн сөп, — диэн үөртэ.
Таатта улууһугар дьиэ акылаатын уларытарга көмө көрүллэр эбит. Сылга 93-97 ыал дьиэтин акылаатын уларытар. Бу олус наадалаах бырагыраама, тоҕо диэтэр, үгүс дьиэ акылаата сытыйар, эмэҕирэр. Улуус баһылыга Михаил Соров маннык бырагырааманы өрөспүүбүлүкэ таһымыгар таһаарарга этии киллэрдэ.
Оскуола-саады тутуу үөрэх эйгэтигэр судаарыстыбаннай бырагыраамаҕа киирбит. Билиҥҥитэ 19-с уочараттаах. Сергей Васильевич маныаха бастаан бырайыагын оҥорторорго, »Тыа сирин кэлим сайыннарыы» бырагыраамаҕа кыттыһар туһунан сүбэлээтэ.

Даайа Амматыттан Чурапчы Мырылата чугас турар. Федеральнай трассаттан Мырылаҕа диэри суол муниципальнай таһымнаах. Муоста тутуутун, суол көрүүтүн-истиитин эмиэ улуус оҥорор. Бу суолунан үксэ мырылалар сылдьаллар, онон Чурапчы дьаһалтатын эмиэ кыттыһыннаран, суолу тупсарарга этии киирдэ.
Даайа Амматын олохтоохторо бырабыыталыстыбаны кытары сирэй көрсөн кэпсэтэртэн астыналларын биллэрдилэр уонна үлэтин үчүгэйинэн сыаналаатылар.