Дьааҥы Баатаҕайын оҕолоро күннэрин Өрөгөй ырыатынан саҕалыыллар

Өрөспүүбүлүкэ күнүн чэрчитинэн Дьааҥы улууһун  Баатаҕай орто оскуолатыгар «Күн» түмсүү араас ис хоһоонноох тэрээһиннэри ыытар.  

Тэрээһин туһунан алын сүһүөх кылаас  учуутала Анна Стручкова маннык сырдатта:

—  Муус устар саҕаланыаҕыттан Баатаҕай орто оскуолатыгар «Күн » түмсүү оҕолоро хас биирдии кылаастарга күн  аайы ыалдьыттаан, араас хайысхалаах тэрээһиннэри ыыттылар. Сүрүн сорук — оскуола үөрэнээччилэрин төрөөбүт тылларын билиигэ көҕүлээһин, Ийэ дойдубутугар тапталы, бэриниилээх буолууну, өрөспүүбүлүкэбит сайдыытыгар, олорон ааспыт чулуу дьонноругар сүгүрүйүү.

      Ый бастакы нэдиэлэтигэр «Күн» оҕолорун  түмсүүтүн саамай көхтөөх актыбыыһа  Алина Ерусланкина  бииргэ үөрэнэр кыргыттарын кытта  олоҥхо туһунан сырдаппыта.

Онтон салгыы өрөспүүбүлүкэбит туһунан «Мин таптыыбын Сахам сирин» диэн тиэмэҕэ викторина  буолбута. Бу күннэргэ «күннэр» алын сүһүөх кылаас оҕолоругар ыалдьыттаатылар. Кинилэр  «Өрөгөй ырыатын»  дорҕоонноохтук ааҕан иһитиннэрдилэр, ыллаан дьиэрэттилэр.  Маны этэн эрдэхтэрэ, «өрөгөй ырыатыттан дойдуга бэриниилээх буолууну иитии саҕаланар» диэн.

Онон тапталлаах өрөспүүбүлүкэбит күнүн көрсө Баатаҕай оҕолоро күн аайы Өрөгөй ырыатынан күннэрин көрсөллөр, төрөөбүт төрүт тылларынан ыллыыллар-туойаллар, тулалыыр  дьоннорун-сэргэлэрин, кырдьаҕас бэтэрээннэрин, хорсун хоодуот  дьоруойдарын  өрө тутан киэн тутталлар.